സൗദിയില് കണ്ണൂര് സ്വദേശിയായ യുവാവിന്റെ വധശിക്ഷ നടപ്പാക്കി
സൗദി അറേബ്യയില് കണ്ണൂര് സ്വദേശിയായ 41കാരന്റെ വധശിക്ഷ നടപ്പാക്കി. തലശേരി പെരിങ്ങാട് സ്വദേശി അബൂട്ടി വെള്ളിലിയാണ് ഇന്ന് രാവിലെ വധശിക്ഷയ്ക്ക് വിധേയനായത്. മയക്കുമരുന്ന് കടത്തിയെന്ന കേസില് ശിക്ഷ നടപ്പാക്കിയെന്ന് സൗദി മന്ത്രാലയം ഔദ്യോഗികമായി ഇന്ത്യന് എംബസിയെ അറിയിച്ചു.
43 കിലോഗ്രാം മാരകമായ മയക്കുമരുന്നുമായി ജി.എം.സി വാനില് യാത്ര ചെയ്യുന്നതിനിടെയാണ് അബൂട്ടിയെ 2023ല് സുരക്ഷാസേന അറസ്റ്റ് ചെയ്തത്. ഒമാനില്നിന്ന് റോഡ് മാര്ഗം മയക്കുമരുന്ന് സൗദിയിലെത്തിച്ചെന്നാണ് പ്രോസിക്യൂഷന് വാദം. കോടതിയില് നടന്ന വിചാരണയില് കുറ്റക്കാരനാണെന്ന് കണ്ടെത്തിയതിനെ തുടര്ന്ന് അബൂട്ടിയെ കോടതി വധശിക്ഷയ്ക്ക് വിധിക്കുകയായിരുന്നു. സുപ്രീം കോടതി വിധി ശരിവച്ചതിന് പിന്നാലെ സൗദി ഭരണാധികാരി രാജകീയ ഉത്തരവ് പുറപ്പെടുവിച്ചതോടെയാണ് വധശിക്ഷ നടപ്പാക്കിയത്.
അബൂട്ടിയുടെ വധശിക്ഷയ്ക്ക് പിന്നാലെ മൃദേഹം നാട്ടിലെത്തിക്കാനുള്ള സാമ്പത്തിക ശേഷിയില്ലാതെ കുടുംബം പ്രതിസന്ധിയിലാണെന്നാണ് ബന്ധുക്കള് പറയുന്നത്. ഭാര്യയും രണ്ട് കുട്ടികളുമാണ് അബൂട്ടിക്കുള്ളത്. മൂന്ന് സഹോദരിമാര് വിവാഹിതരാണ്. വര്ഷങ്ങള്ക്ക് മുമ്പ് പിതാവ് മരിച്ചിരുന്നു.
സന്ദര്ശക വിസയിലാണ് അബൂട്ടി സൗദിയിലെത്തിയതെന്ന് അയല്വാസിയും പഞ്ചായത്ത് പ്രതിനിധിയുമായ അസ്ലം ചിന്നന് പറഞ്ഞു. ജോലി വിസയില്ലാതെ സൗദിയില് നിയമപരമായി ഡ്രൈവിംഗ് ലൈസന്സ് നേടാന് കഴിയാത്ത സാഹചര്യമായിരുന്നുവെന്നും അദ്ദേഹം വ്യക്തമാക്കി.
കേസുമായി ബന്ധപ്പെട്ട് ഇപ്പോഴും നിരവധി ചോദ്യങ്ങള് ബാക്കിനില്ക്കുന്നതായും അസ്ലം പറഞ്ഞു. വിസയുമായി ബന്ധപ്പെട്ട് കണ്ണൂര് സ്വദേശിയായ ഒരു സുഹൃത്ത് അബൂട്ടിയെ വഞ്ചിച്ചെന്ന ആരോപണം നേരത്തെ ഉയര്ന്നിരുന്നതായും ഒമാനിലെ ഒരു സ്പോണ്സര് മയക്കുമരുന്ന് കേസില് അബൂട്ടിയെ കുടുക്കിയെന്ന ആരോപണവും ഉയര്ന്നിരുന്നു. സൗദിയില് കേസ് നടത്തുന്നതിനാവശ്യമായ നിയമസഹായം ലഭ്യമാക്കാന് കുടുംബത്തിന് സാമ്പത്തിക ശേഷിയില്ലായിരുന്നുവെന്നും അസ്ലം വ്യക്തമാക്കി.
إرسال تعليق