പഴശ്ശി സാഗര് മിനി ജലവൈദ്യുതി പദ്ധതി പൂര്ത്തീകരണത്തിലേക്ക്
മട്ടന്നൂര് : നിര്മ്മാണം തുടങ്ങി പല പ്രതിസന്ധികളും മറികടന്ന് പഴശ്ശി സാഗര് മിനി ജലവൈദ്യുതി പദ്ധതി പൂര്ത്തീകരണത്തിലേക്ക്.
പഴശ്ശി അണക്കെട്ടിനോട് ചേര്ന്ന് നിര്മ്മാണം പുരോഗമിക്കുന്ന 7.5 മെഗാവാട്ട് ശേഷിയുള്ള പദ്ധതിയുടെ 70 ശതമാനം പ്രവൃത്തികളും ഇതിനകം പൂര്ത്തിയായി. അടുത്ത കാലവര്ഷത്തില്ത്തന്നെ വൈദ്യുതി ഉത്പാദനം ആരംഭിക്കുകയെന്ന ലക്ഷ്യത്തോടെ ശേഷിക്കുന്ന പ്രവൃത്തികള് ദ്രുതഗതിയില് മുന്നേറുകയാണ്. മെയ് 31നകം നിര്മ്മാണം പൂര്ത്തിയാക്കണമെന്ന വൈദ്യുതി വകുപ്പ് മന്ത്രിയുടെ നിര്ദ്ദേശം പാലിക്കാനുള്ള ശ്രമത്തിലാണ് അധികൃതര്.
പദ്ധതിയുടെ പുരോഗതി വിലയിരുത്തുന്നതിനും അവശേഷിക്കുന്ന പ്രവൃത്തികള് സമയബന്ധിതമായി പൂര്ത്തിയാക്കുന്നതിനുമുള്ള മന്ത്രിതല അവലോകന യോഗം ശനിയാഴ്ച പദ്ധതി പ്രദേശത്ത് നടന്നു. വൈദ്യുതി മന്ത്രി സണ്ണി ജോസഫിനൊപ്പം ജലവിഭവ വകുപ്പ് മന്ത്രി മോന്സ് ജോസഫും യോഗത്തില് പങ്കെടുത്തു. നിര്മ്മാണം ഒന്നോ രണ്ടോ മാസം വൈകിയാല് ഒരു ഉത്പാദന സീസണ് തന്നെ നഷ്ടമാകുന്ന സാഹചര്യമാണുള്ളത്. കാലവര്ഷത്തെ ആശ്രയിച്ചുമാത്രം പ്രവര്ത്തിക്കുന്ന പദ്ധതിയായതിനാല് സമയബന്ധിതമായ പൂര്ത്തീകരണം ഏറെ നിര്ണായകമാണ്. ജൂണ് മുതല് നവംബര് വരെയാണ് പദ്ധതിയില്നിന്ന് പൂര്ണതോതില് വൈദ്യുതി ഉത്പാദിപ്പിക്കാന് കഴിയുക. അതിനാല് മെയ് അവസാനത്തോടെ നിര്മ്മാണം പൂര്ത്തിയാക്കി കാലവര്ഷത്തിന് മുമ്പ് പരീക്ഷണാടിസ്ഥാനത്തിലുള്ള പ്രവര്ത്തനങ്ങള് ആരംഭിക്കുകയാണ് ലക്ഷ്യം.പഴശ്ശി അണക്കെട്ടില്നിന്ന് വളപട്ടണം പുഴയിലേക്ക് കാലവര്ഷക്കാലത്ത് ഒഴുകിപ്പോകുന്ന അധികജലം പ്രയോജനപ്പെടുത്തിയാണ് വൈദ്യുതി ഉത്പാദിപ്പിക്കുന്നത്. അണക്കെട്ടില്നിന്നുള്ള വെള്ളം പ്രധാന തുരങ്കത്തിലൂടെ കടത്തി മൂന്ന് ഉപതുരങ്കങ്ങളിലേക്കെത്തിച്ച് 2.5 മെഗാവാട്ട് ശേഷിയുള്ള മൂന്ന് ടര്ബൈനുകള് പ്രവര്ത്തിപ്പിക്കുന്നതാണ് പദ്ധതി. ഇതുവഴി ആകെ 7.5 മെഗാവാട്ട് വൈദ്യുതി ഉത്പാദിപ്പിക്കാനാകും.പ്രധാന തുരങ്കത്തിന്റെയും ഉപതുരങ്കങ്ങളുടെയും നിര്മ്മാണം ഇതിനകം പൂര്ത്തിയായിട്ടുണ്ട്. പദ്ധതിയുടെ പ്രധാന ഘടകമായ പവര്ഹൗസിന്റെ നിര്മ്മാണവും 70 ശതമാനം പിന്നിട്ടു. ക്രെയിന് ഉപയോഗിച്ച് ജനറേറ്ററുകളും മറ്റ് യന്ത്രഭാഗങ്ങളും പവര്ഹൗസില് സ്ഥാപിക്കുന്ന പ്രവൃത്തി അടുത്ത മാസം ആരംഭിക്കും. ഇതോടെ പദ്ധതിയുടെ നിര്ണായക ഘട്ടത്തിലേക്ക് നിര്മ്മാണം കടക്കും. വേനല്ക്കാലത്ത് കുടിവെള്ള ആവശ്യത്തിനായി പഴശ്ശി അണക്കെട്ടില് ജലം സംഭരിക്കേണ്ടതിനാല് വൈദ്യുതി പദ്ധതിയുടെ നിര്മ്മാണവും പ്രവര്ത്തനവും തടസ്സപ്പെടാതിരിക്കാനുള്ള ക്രമീകരണങ്ങളും ഒരുക്കുന്നുണ്ട്. ഇതിനായി അണക്കെട്ടില്നിന്ന് തുരങ്കത്തിലേക്ക് വെള്ളം കടത്തിവിടുന്ന ഭാഗത്ത് താല്ക്കാലിക ബാരേജ് നിര്മ്മിക്കുന്ന പ്രവൃത്തിയും പൂര്ത്തിയായിവരുന്നു.അണക്കെട്ടിന്റെ പൂര്ണ സംഭരണനിലയായ എഫ്.ആര്.എല്. 26.52 മീറ്ററാണെങ്കിലും 19 മീറ്റര് ജലനിരപ്പില്പ്പോലും ജനറേറ്ററുകള് പ്രവര്ത്തിപ്പിക്കാന് കഴിയുന്ന രീതിയിലാണ് പദ്ധതി വിഭാവനം ചെയ്തിരിക്കുന്നത്. മഴക്കാലത്ത് 23.5 മീറ്റര് സംഭരണനില നിലനിര്ത്തിക്കൊണ്ട് ആറുമാസം 7.5 മെഗാവാട്ട് ഉത്പാദനശേഷി കൈവരിക്കാനാകുമെന്നാണ് പ്രതീക്ഷ.ജൂണ് മുതല് നവംബര് വരെയുള്ള കാലയളവിലാണ് പൂര്ണതോതിലുള്ള ഉത്പാദനം സാധ്യമാകുക. എന്നാല് കുടിവെള്ളത്തിനാവശ്യമായ ജലസംഭരണം നിലനിര്ത്തിക്കൊണ്ട് ഡിസംബര്, ജനുവരി മാസങ്ങളിലും വൈദ്യുതി ഉത്പാദനം നടത്താനായാല് പദ്ധതി കൂടുതല് നേട്ടമാകും. ഉത്പാദനത്തിനുശേഷം വെള്ളം വീണ്ടും വളപട്ടണം പുഴയിലേക്ക് ഒഴുക്കിവിടും.കാലവര്ഷത്തെ ആശ്രയിക്കുന്ന ജലവൈദ്യുതി പദ്ധതികളില് സമയമാണ് ഏറ്റവും നിര്ണായകം. നിര്മ്മാണം പൂര്ത്തിയാക്കുന്നതില് ഒന്നോ രണ്ടോ മാസത്തെ കാലതാമസമുണ്ടായാല് ആ വര്ഷത്തെ ഉത്പാദനസാധ്യത തന്നെ നഷ്ടപ്പെടും. അതുകൊണ്ടുതന്നെ പഴശ്ശി സാഗറിന്റെ കാര്യത്തില് ഓരോ ദിവസവും നിര്ണായകമാണ്. ശേഷിക്കുന്ന പ്രവൃത്തികള് ഏകോപിപ്പിച്ച് മെയ് 31നകം പദ്ധതി പൂര്ത്തിയാക്കാനുള്ള ശ്രമങ്ങള് ഊര്ജിതമാക്കിയിട്ടുണ്ട്. വടക്കന് കേരളത്തിലെ വൈദ്യുതി ഉത്പാദനരംഗത്ത് ശ്രദ്ധേയമായ നേട്ടമാകാന് കഴിയുന്ന പദ്ധതിയാണ് പഴശ്ശി സാഗര്. അണക്കെട്ടിലെ വെള്ളം കുടിവെള്ള ആവശ്യത്തിന് ഉപയോഗിക്കുന്നതിനൊപ്പം കാലവര്ഷത്തില്ഒഴുകിപ്പോകുന്ന ജലം വൈദ്യുതി ഉത്പാദനത്തിനും പ്രയോജനപ്പെടുത്താനാകുമെന്നതാണ് പദ്ധതിയുടെ പ്രത്യേകത.
إرسال تعليق