ശബരിമല യുവതി പ്രവേശനം: പുനഃപരിശോധന ഹര്ജികള് പുതിയ 9 അംഗ ബെഞ്ച് വാദം കേള്ക്കും; ഏപ്രില് 7 മുതല് 22 വരെ; നിര്ണായകം സംസ്ഥാന സര്ക്കാര് നിലപാട്, യുവതീ പ്രവേശനത്തെ എതിര്ത്ത് കേന്ദ്രം
ശബരിമലയില് സ്ത്രീകള്ക്ക് പ്രായഭേദമെന്യേ പ്രവേശനം അനുവദിക്കണമെന്ന 2018-ലെ സുപ്രീം കോടതി വിധിക്കെതിരായ പുനഃപരിശോധനാ ഹര്ജികള് പുതിയ ഒമ്പതംഗ ബെഞ്ച് വാദം കേള്ക്കും. നേരത്തെ രൂപീകരിച്ചിരുന്ന ഒമ്പതംഗ ബെഞ്ചില് ചീഫ് ജസ്റ്റിസ് സൂര്യകാന്ത് മാത്രമാണ് സുപ്രീംകോടതിയില് അവശേഷിക്കുന്നത് എന്ന സാഹചര്യത്തിലാണ് പുതിയ ബെഞ്ച് രൂപീകരിക്കുന്നത്. വാദം കേള്ക്കലടക്കമുള്ള തുടര്നടപടികളും ചീഫ് ജസ്റ്റിസിന്റെ നേതൃത്വത്തിലുള്ള മൂന്നംഗ ബെഞ്ച് നിശ്ചയിച്ചു.
വിധി പുനഃപരിശോധിക്കുന്നതിനെ കേന്ദ്രസര്ക്കാര് പിന്തുണയ്ക്കുന്നുവെന്ന് സോളിസിറ്റര് ജനറല് തുഷാര് മേത്ത ബെഞ്ചിനെ അറിയിച്ചത് ശ്രദ്ധേയമാണ്. യുവതി പ്രവേശനത്തെ എതിര്ക്കുന്നുവെന്നാണ് കേന്ദ്രസര്ക്കാര് നിലപാട്. സംസ്ഥാന സര്ക്കാരിന്റെ നിലപാടായിരിക്കും ഇനി പ്രധാനം. യുവതീപ്രവേശനത്തെ അനുകൂലിച്ച് പിണറായി സര്ക്കാര് സ്വീകരിച്ച നിലപാടിന്റെകൂടി അടിസ്ഥാനത്തിലാണ് 2016 സെപ്റ്റംബര് 28-ന് സുപ്രീംകോടതി വിധിയുണ്ടായത്. പക്ഷേ, 2019-ലെ ലോക്സഭാ തിരഞ്ഞെടുപ്പില് ഈ വിഷയം എല്.ഡി.എഫിന് വലിയ തിരിച്ചടിയുണ്ടാക്കി. അതിനുശേഷം, വിഷയം ഒതുക്കിവെക്കാനാണ് സര്ക്കാരും എല്.ഡി.എഫും ശ്രമിച്ചത്. യുവതീപ്രവേശനത്തില് സര്ക്കാരിന്റെയും സി.പി.എമ്മിന്റെയും നിലപാട് മാറിയതായി എവിടെയും വ്യക്തമാക്കിയിട്ടില്ല. എന്നാല്, യുവതീപ്രവേശനം വേണമെന്ന പരസ്യനിലപാടും അങ്ങനെ പ്രചരിപപ്പിക്കാനും നില്ക്കുന്നില്ല.
നിലപാട് കോടതിയില് വ്യക്തമാക്കുമെന്ന് സര്ക്കാരും വ്യക്തമാക്കിയിരുന്നു. നിലവില് സംസ്ഥാനത്ത് തിരഞ്ഞെടുപ്പ് അടുത്തുനില്ക്കുന്ന സാഹചര്യത്തില് സിപിഎം ഒഴിവാക്കി വിടാനാഗ്രഹിച്ച ഘട്ടം ഇപ്പോള് ഉണ്ടായി എന്നത് സിപിഎമ്മിനെ സംബന്ധിച്ചും നിര്ണായകമാണ്. ശബരിമല യുവതി പ്രവേശനവുമായി ബന്ധപ്പെട്ടുള്ള സര്ക്കാര് നിലപാട് ഒരു മിനിറ്റ് കൊണ്ട് എടുക്കാന് കഴിയുന്നതല്ലെന്ന് മന്ത്രി പി രാജീവ് പറഞ്ഞത് തിരഞ്ഞെടുപ്പ് കൂടി കണക്കിലെടുത്തണ്. ആദ്യം പുനഃപരിശോധന ബെഞ്ച് വരട്ടെ. അതിനുശേഷം നിലപാട് അറിയിക്കുമെന്നും സര്ക്കാരിന്റെ വിശദീകരണം ആവശ്യമുണ്ടോ എന്നതും പുതിയ ബെഞ്ച് ആണ് തീരുമാനിക്കേണ്ടതെന്നും സര്ക്കാര് നിലപാട് അല്ല പുനഃപരിശോധിക്കുന്നതെന്നും പി രാജീവ് പറഞ്ഞിരുന്നു.
പുനഃപരിശോധനാ ഹര്ജിക്കാരുടേയും അവരെ പിന്തുണയ്ക്കുന്ന കക്ഷികളുടെയും വാദം ഏപ്രില് 7 മുതല് ഏപ്രില് 9 വരെ കേള്ക്കും. എതിര്ക്കുന്നവരുടെ വാദങ്ങള് ഏപ്രില് 14 മുതല് ഏപ്രില് 16 വരെ കേള്ക്കും. ഏപ്രില് 21ന് റുപടി സത്യവാങ്മൂലങ്ങള് സമര്പ്പിക്കാം. ഏപ്രില് 22-ന് വാദം അവസാനിപ്പിക്കാനാണ് ഉദ്ദേശിക്കുന്നത്. ഒമ്പതംഗ ബെഞ്ചിലെ അംഗങ്ങളെ ചീഫ് ജസ്റ്റിസ് പ്രത്യേക ഉത്തരവിലൂടെ അറിയിക്കും
إرسال تعليق