സി.ജെ.പിയുടെ പേരിൽ മെറ്റയിലൂടെ ഫണ്ട് പിരിക്കുന്നതാര്? ഗ്യാനേഷ് കുമാറിനെതിരായ സമരത്തെ തകർക്കാൻ സംഘപരിവാർ ഇടപെടലെന്ന് ആരോപണം; തങ്ങൾക്ക് ബന്ധമില്ലെന്ന് കോക്ക്റോച്ച് ജനതാ പാർട്ടി
സി.ജെ.പി (CJP)ക്ക് വേണ്ടി എന്ന പേരിൽ ഫണ്ട് പിരിക്കുന്നത് ആരാണ്? മെറ്റയിൽ (Meta) അഞ്ച് സംഘടനകൾ നൽകിയ ഫണ്ട് ശേഖരണ പരസ്യങ്ങളെ സംബന്ധിച്ച് നിർണായക വിവരങ്ങളാണ് ഇപ്പോൾ പുറത്തുവരുന്നത്. സംഭാവനകൾ സ്വീകരിക്കാനായി ജന്തർമന്തർ പ്രതിഷേധങ്ങളുടെ ദൃശ്യങ്ങളാണ് ഇതിൽ പലരും ഉപയോഗിച്ചിരിക്കുന്നത്.
ലോഗോകളിലെയും നൽകിയിട്ടുള്ള കോൺടാക്റ്റ് വിവരങ്ങളിലെയും പൊരുത്തക്കേടുകളും, ഫണ്ട് യഥാർത്ഥത്തിൽ ആർക്കാണ് ലഭിക്കുന്നത് എന്നതിനെക്കുറിച്ചുള്ള അവ്യക്തതയും ഇത്തരം ക്യാമ്പയിനുകളുടെ സുതാര്യതയെ ചോദ്യം ചെയ്യുന്നതാണ്. ഇതിന് പുറമെ, മുഖ്യ തിരഞ്ഞെടുപ്പ് കമ്മീഷണർ ഗ്യാനേഷ് കുമാറിനെതിരെയുള്ള സമരത്തെ തകർക്കുന്നതിന് വേണ്ടിയുള്ള സംഘപരിവാറിന്റെ ബോധപൂർവ്വമായ ഇടപെടലാണ് ഈ വ്യാജ ഫണ്ട് ശേഖരണത്തിന് പിന്നിലെന്ന ഗുരുതരമായ ആരോപണവും ഇതിനിടെ ശക്തമായി ഉയരുന്നുണ്ട്.
അതേസമയം, ഈ ഫണ്ട് ശേഖരണ പേജുകളുമായി തങ്ങൾക്ക് യാതൊരു ബന്ധവുമില്ലെന്ന് കോക്ക്റോച്ച് ജനതാ പാർട്ടി (CJP) വ്യക്തമാക്കി. തങ്ങളുടെ പ്രതിച്ഛായ തകർക്കാനും, ഗ്യാനേഷ് കുമാറിനെതിരായ ജനകീയ സമരത്തെ അട്ടിമറിക്കാനുമുള്ള ആസൂത്രിത ശ്രമമാണ് ഇതിന് പിന്നിലെന്ന് സംശയിക്കുന്നതായും അവർ കൂട്ടിച്ചേർത്തു.
ന്യൂഡൽഹിയിലെ ജന്തർ മന്തറിൽ പ്രതിഷേധം തുടർന്നപ്പോൾ, നിരവധി ഫേസ്ബുക്ക് പേജുകൾ പ്രതിഷേധക്കാർക്ക് ഭക്ഷണം, ലഘുഭക്ഷണം, ശുചിത്വ കിറ്റുകൾ, സുരക്ഷാ ഉപകരണങ്ങൾ എന്നിവ നൽകുന്നതിന് സംഭാവന തേടിയുള്ള പരസ്യങ്ങൾ നൽകാൻ തുടങ്ങി. പ്രതിഷേധ സ്ഥലങ്ങളിൽ സന്നദ്ധപ്രവർത്തകർ സാധനങ്ങൾ വിതരണം ചെയ്യുന്ന വീഡിയോകളും, ₹200 മുതൽ ₹5,000 വരെയുള്ള തുകകൾ സംഭാവന ചെയ്യാൻ ആളുകളോട് ആവശ്യപ്പെടുന്ന അപ്പീലുകളും പരസ്യങ്ങളിൽ ഉണ്ടായിരുന്നു.
ഓപ്പൺഹാർട്ടഡ് ഹെൽപ്പിംഗ് ഫൗണ്ടേഷൻ, തഥാസ്തു റോസ്ഗർ, ബിഎസ്എം ഫൗണ്ടേഷൻ, ഉദാൻ ആശ ഫൗണ്ടേഷൻ, നെക്സസ് ഓഫ് റിലീഫ് ഇനിഷ്യേറ്റീവ് ഫൗണ്ടേഷൻ (എൻആർഐ ഫൗണ്ടേഷൻ) എന്നിവയുൾപ്പെടെ മെറ്റാ പ്ലാറ്റ്‌ഫോമുകളിൽ പ്രതിഷേധവുമായി ബന്ധപ്പെട്ട ഫണ്ട്‌റൈസിംഗ് അപ്പീലുകൾ ഉപയോഗിച്ച അഞ്ച് സംഘടനകളെ ഓഫ് ബീറ്റ് കൺസേൺസ് പ്ലാറ്റ്ഫോം നടത്തിയ അന്വേഷണത്തിലൂടെ തിരിച്ചറിഞ്ഞു. നിരവധി പരസ്യങ്ങൾ ഉപയോക്താക്കളെ കാഷ്ഫ്രീയിലും റേസർപേയിലും ഹോസ്റ്റ് ചെയ്തിരിക്കുന്ന പേയ്‌മെന്റ് ഫോമുകളിലേക്ക് നയിച്ചുവെന്നും വ്യക്തമാണ്.
ഈ ധനസമാഹരണ പേജുകളുമായി തങ്ങൾക്ക് ഔദ്യോഗിക ബന്ധമൊന്നുമില്ലെന്ന് സി.ജെ.പി (CJP) വ്യക്തമാക്കി കഴിഞ്ഞു. തങ്ങളുടെ പ്രതിച്ഛായ തകർക്കാൻ ആസൂത്രിതമായ ഒരു ശ്രമം നടക്കുന്നതായും അവർ സംശയിക്കുന്നുണ്ട്. ഈ വിവരങ്ങൾ പരിശോധിക്കുമ്പോൾ, സിജെപിയുടെ പ്രതിഷേധ പ്രവർത്തനങ്ങളെക്കുറിച്ച് വിവരങ്ങൾ നൽകിയിരിക്കുന്നതിനെ കുറിച്ചും ഈ പേജുകൾ, സംഘടനകൾ, പണം കൈമാറുന്ന ഇടങ്ങൾ എന്നിവ തമ്മിലും വലിയ പൊരുത്തക്കേടുകൾ പ്രഥമദൃഷ്ട്യാ വ്യക്തമാണ്.
കടപ്പാട് : ഓഫ് ബീറ്റ് കൺസെൺസ്
Post a Comment