സ്മിത് മച്ചാറിനെ കൊലപ്പെടുത്തിയിട്ട് വിമാനം റാഞ്ചി ടെൽ അവീവിലെ കെട്ടിടത്തിലേക്ക് ഇടിച്ചിറക്കാൻ പദ്ധതിയിട്ടു; ലക്ഷ്യമിട്ടത് 9/11 മോഡൽ ഭീകരാക്രമണം
ദുബായി: ഫ്ലൈദുബായ് അട്ടിമറിശ്രമക്കേസിൽ ഞെട്ടിക്കുന്ന വിവരങ്ങൾ പുറത്ത്. വിമാനം റാഞ്ചി 9/11 മാതൃകയിലുള്ള ഭീകരാക്രമണത്തിനാണ് കോ-പൈലറ്റ് ഹമ്മാം അൽ-ഹമ്മാമി പദ്ധതിയിട്ടിരുന്നതായി റിപ്പോർട്ടുകളുണ്ട്. കോക്‌പിറ്റിൽ ക്യാപ്റ്റൻ സ്മിത് മച്ചാറിനെ കൊലപ്പെടുത്തുകയായിരുന്നു ലക്ഷ്യം. തുടർന്ന് വിമാനം റാഞ്ചി ടെൽ അവീവിലെ കെട്ടിടത്തിലേക്ക് ഇടിച്ചിറക്കാനാണ് പദ്ധതിയിട്ടിരുന്നതെന്നും അന്വേഷണസംഘം വെളിപ്പെടുത്തി.
ഒമാൻ പൗരനായ അൽ-ഹമ്മാമി ഒറ്റയ്ക്കാണ് ആക്രമണം ആസൂത്രണം ചെയ്തതെന്നാണ് ഇസ്രയേലിന്‍റെ പ്രാഥമിക അന്വേഷണത്തിലെ കണ്ടെത്തൽ. ക്യാപ്റ്റനെ ആക്രമിച്ചശേഷം വിമാനം സാധാരണ നിലയിൽ മുന്നോട്ട് കൊണ്ടുപോകാനായിരുന്നു ഉദ്ദേശിച്ചതെന്ന് യുഎഇയിൽ അറസ്റ്റിലായ അൽ-ഹമ്മാമി അന്വേഷണ സംഘത്തോട് വെളിപ്പെടുത്തിയതായും റിപ്പോർട്ടുകളുണ്ട്.
ബെൻ ഗുരിയോൺ വിമാനത്താവളത്തിൽ ലാൻഡിംഗിന് അനുമതി നേടിയ ശേഷം വിമാനത്താവളത്തിലെ കെട്ടിടത്തിലേക്കോ മറ്റ് വിമാനങ്ങളിലേക്കോ ഇടിപ്പിക്കാനും പദ്ധതിയുണ്ടായിരുന്നു. വിമാനത്തിന്‍റെ നിയന്ത്രണം ഏറ്റെടുക്കുന്നതിനായി ജോർദാന് മുകളിലൂടെ പറക്കുന്ന സമയമാണ് ഇയാൾ തെരഞ്ഞെടുത്തതെന്നും റിപ്പോർട്ടുകൾ പറയുന്നു.
സംശയം ഒഴിവാക്കുന്നതിനും ആക്രമണത്തിന് ആവശ്യമായ സമയം ലഭിക്കുന്നതിനുമായിരുന്നു ഈ സമയക്രമമെന്നാണ് അന്വേഷണ സംഘത്തിന്‍റെ വിലയിരുത്തൽ. ജൂലൈയിലും അൽ-ഹമ്മാമി ആക്രമണത്തിന് പദ്ധതിയിട്ടിരുന്നെങ്കിലും ഒപ്പമുണ്ടായിരുന്ന ജീവനക്കാരനുമായുള്ള സൗഹൃദത്തെ തുടർന്ന് അവസാന നിമിഷം പദ്ധതി ഉപേക്ഷിച്ചുവെന്നും സൂചനയുണ്ട്.
ഫ്ലൈദുബായിൽ ജോലി ചെയ്തിരുന്ന കാലയളവിൽ കഴിഞ്ഞ ഏതാനും മാസങ്ങൾക്കിടെ അൽ-ഹമ്മാമി ബെൻ ഗുരിയോൺ വിമാനത്താവളം പലതവണ സന്ദർശിച്ചിരുന്നു. ജൂണിലെ സന്ദർശനത്തിനിടെ വിവരങ്ങൾ ശേഖരിക്കുകയും ആക്രമണത്തിനുള്ള തയാറെടുപ്പുകൾ നടത്തുകയും ചെയ്തുവെന്നാണ് പുറത്തുവരുന്ന വിവരം.
ഫ്ലൈദുബായ് ആക്രമണശ്രമം: അന്താരാഷ്ട്ര വിമാന സർവീസുകളുടെ സുരക്ഷ പരിശോധിച്ച് ഇസ്രയേൽ
ടെൽ അവീവ്: ദുബായിൽ നിന്ന് ടെൽ അവീവിലേക്ക് വരികയായിരുന്ന ഫ്ലൈദുബായ് വിമാനത്തിന് നേരെ ഒമാനി സഹപൈലറ്റിന്‍റെ ഭാഗത്തുനിന്നും ഉണ്ടായ ആക്രമണശ്രമത്തെ തുടർന്ന്, ഇസ്രയേലിലേക്കുള്ള അന്താരാഷ്ട്ര വിമാന സർവീസുകളുടെ സുരക്ഷ സമഗ്രമായി പുനഃപരിശോധിക്കാൻ പ്രധാനമന്ത്രി ബെഞ്ചമിൻ നെതന്യാഹു ഉത്തരവിട്ടു.
ഇന്ത്യൻ ക്യാപ്റ്റനെ കുത്തിവീഴ്ത്തിയ ശേഷം വിമാനം തകർക്കാൻ ശ്രമിച്ച ഈ സംഭവത്തിന് പിന്നാലെ ഇസ്രയേലിൽ കടുത്ത പ്രതിഷേധവും അന്വേഷണത്തിനായുള്ള ആവശ്യങ്ങളും ശക്തമായിട്ടുണ്ട്.വിമാനത്തിലുണ്ടായിരുന്ന ഒമാനി പൈലറ്റിന് ഇസ്രയേലുമായി ഔദ്യോഗിക നയതന്ത്രബന്ധമില്ലാത്ത രാജ്യത്തുനിന്നുള്ളയാളായിട്ടും എങ്ങനെ അനുമതി ലഭിച്ചു എന്നതിനെച്ചൊല്ലി രാഷ്ട്രീയ പോര് രൂക്ഷമാണ്.
സുരക്ഷാ വീഴ്ചയുടെ ഉത്തരവാദിത്തം മൊസാദ്, ഷിൻ ബെറ്റ് എന്നീ ഏജൻസികളിലാണെന്ന് ഗതാഗത മന്ത്രി മിരി റെഗെവ് പ്രതിരോധിച്ചെങ്കിലും, പ്രതിപക്ഷ നേതാക്കളായ യായർ ലാപിഡ്, ഗാഡി ഐസൻകോട്ട് എന്നിവർ ഇതിനെതിരെ കടുത്ത വിമർശനവുമായി രംഗത്തെത്തി. സുരക്ഷാ വീഴ്ചകൾ സർക്കാരിന്‍റെ ഭാഗത്തുനിന്നുള്ള ഗുരുതരമായ വീഴ്ചയാണെന്നും ഗതാഗത മന്ത്രി രാജിവെക്കണമെന്നും അവർ ആവശ്യപ്പെട്ടു.
ക്യാപ്റ്റൻ സ്മിത് മച്ചാറിനെ പ്രശംസിച്ച് നെതന്യാഹു
അബുദാബി: ദുബായിൽനിന്നു ടെൽ അവീവിലേക്ക് പറന്ന ഫ്ലൈ ദുബായ് വിമാനം തകർക്കാൻ സഹപൈലറ്റ് നടത്തിയ ഭീകരാക്രമണശ്രമം ചെറുത്തുതോൽപ്പിച്ച ഇന്ത്യൻ പൈലറ്റ് ക്യാപ്റ്റൻ സ്മിത് മച്ചാറിനെ (38) പ്രശംസിച്ച് ഇസ്രയേൽ പ്രധാനമന്ത്രി ബെഞ്ചമിൻ നെതന്യാഹു. ആക്രമണത്തിൽ ഗുരുതരമായി പരിക്കേറ്റ് അബുദാബിയിലെ ആശുപത്രിയിൽ ചികിത്സയിൽ കഴിയുന്ന സ്മിത് മച്ചാറുമായി നെതന്യാഹു ഫോണിൽ സംസാരിച്ചു.
സ്മിത് മച്ചാറിനെ ”ലോകത്തിന്‍റെ മുഴുവൻ വീരനായകൻ” എന്നു വിശേഷിപ്പിച്ച നെതന്യാഹു, അദ്ദേഹത്തെയും ഇന്ത്യൻ പ്രധാനമന്ത്രി നരേന്ദ്ര മോദിയെയും ഇസ്രയേലിന്‍റെ സ്വാതന്ത്ര്യദിന ചടങ്ങിൽ തിരി തെളിക്കുന്നതിനായി ക്ഷണിച്ചു.
‘നിങ്ങൾ ഇസ്രയേലിന്‍റെയും ഇന്ത്യയുടെയും മാത്രമല്ല, ലോകത്തിന്‍റെ മുഴുവൻ വീരനായകനാണ്. അസാധ്യമായ സാഹചര്യത്തിലും നിങ്ങൾ കാണിച്ച ധൈര്യവും സമചിത്തതയും ആയിരക്കണക്കിനു ജീവനുകളെയാണ് രക്ഷിച്ചത്’ -നെതന്യാഹു പറഞ്ഞു. സാധാരണയായി ഇസ്രയേൽ പൗരന്മാർക്ക് മാത്രം നൽകുന്ന ആദരവാണ് ഇത്തവണ സ്മിതിനും പ്രധാനമന്ത്രി മോദിക്കും നൽകുന്നതെന്നും അദ്ദേഹം കൂട്ടിച്ചേർത്തു.
ആക്രമണത്തിനുമുമ്പ് സഹപൈലറ്റ് പ്രാർഥിക്കാൻ സമയം ചോദിച്ചിരുന്നുവെന്നും പ്രാർഥനയ്ക്കുശേഷം പെട്ടെന്നു തന്‍റെ തലയ്ക്കു പിന്നിൽ ശക്തമായ അടിയേൽക്കുകയായിരുന്നുവെന്നും സ്മിത് ഓർത്തെടുത്തു. വിമാനത്തിന് എന്തോ തകരാർ സംഭവിച്ചുവെന്നാണ് ആദ്യം കരുതിയതെങ്കിലും തുടർച്ചയായി ആക്രമണം ഉണ്ടായപ്പോഴാണ് കൂടെയുള്ള സഹപൈലറ്റാണ് ആക്രമിക്കുന്നതെന്ന് മനസിലായത്. കാഴ്ച മങ്ങുകയും വിമാനം കുത്തനെ താഴേക്കു പതിക്കാൻ തുടങ്ങുകയും ചെയ്തതോടെയാണ് അവസാന ശ്രമമെന്ന നിലയിൽ സർവശക്തിയുമെടുത്ത് വാതിൽ തുറന്നതെന്ന് സ്മിത് വ്യക്തമാക്കി.
എൻജിനുകൾ ഓഫാക്കാൻ സഹപൈലറ്റ് ശ്രമിച്ചു
ദുബായ്: ഒമാനി സഹപൈലറ്റ് ഹമ്മാം അൽ ഹമ്മാമി, ഫ്ലൈ ദുബായ് വിമാനത്തിന്‍റെ എൻജിനുകൾ ഓഫ് ചെയ്യാൻ ശ്രമിച്ചതായി റിപ്പോർട്ട്. ഇറ്റാലിയൻ പത്രമായ കോറിയറെ ദെല്ല സെറയാണ് ഈ വിവരങ്ങൾ പുറത്തുവിട്ടത്. വിമാനത്തിന്‍റെ ക്യാപ്റ്റനായ സ്മിത് മച്ചാറിനെ വധിച്ച്, വിമാനം ടെൽ അവീവിലേക്കു പറത്തി അവിടത്തെ വൻകിട കെട്ടിടത്തിൽ ഇടിച്ചിറക്കാനായിരുന്നു അൽ ഹമ്മാമിയുടെ പ്രാഥമിക പദ്ധതിയെന്ന് റിപ്പോർട്ടിൽ പറയുന്നു.
കോക്പിറ്റിനുള്ളിൽ പ്രാർഥിക്കാൻ അനുവാദം ചോദിച്ചശേഷം, പിന്നിലൂടെ ചെന്ന് ക്രാഷ് ആക്സ് ഉപയോഗിച്ചാണ് അൽ ഹമ്മാമി ക്യാപ്റ്റൻ സ്മിത് മച്ചാറിനെ ആക്രമിച്ചത്.
ടെൽ അവീവിലേക്കു വിമാനം കൊണ്ടുപോകാൻ കഴിയില്ലെന്നു മനസിലായതോടെ, അൽ ഹമ്മാമി വിമാനം മരുഭൂമിയിൽ ഇടിച്ചിറക്കാൻ ശ്രമിച്ചു. ഓട്ടോപൈലറ്റ് സംവിധാനം ഓഫ് ചെയ്ത ശേഷം കൺട്രോൾ സ്റ്റിക്ക് മുന്നോട്ടു തള്ളിയതോടെ 30 സെക്കൻഡിനുള്ളിൽ വിമാനം 17,000 അടിയോളം താഴേക്ക് പതിച്ചു. ഇതിനിടെ എൻജിനുകളിലേക്കുള്ള ഇന്ധന വിതരണം തടസപ്പെടുത്തുന്ന വിധത്തിൽ സ്വിച്ചുകൾ ഓഫ് ചെയ്യാൻ സഹപൈലറ്റ് ശ്രമിച്ചതാണ് വിമാനത്തിനുള്ളിലെ എമർജൻസി ലൈറ്റുകൾ തെളിയാൻ കാരണമെന്നും റിപ്പോർട്ടുണ്ട്.
ലക്ഷ്യമിട്ടത് വിമാനം തകർക്കാൻ; മരണത്തെ ഭയമില്ലെന്നും പ്രതി ഹമ്മാമി
ദുബായ്: ദുബായിൽനിന്നു ടെൽ അവീവിലേക്കു പറന്ന ഫ്ലൈ ദുബായ് വിമാനം തകർക്കാൻ ശ്രമിച്ച സംഭവത്തിൽ പിടിയിലായ ഒമാൻ സ്വദേശിയായ സഹപൈലറ്റ് ഹമാം അൽ ഹമ്മാമി (29) കുറ്റസമ്മതം നടത്തിയതായി റിപ്പോർട്ട്. വിമാനം തകർക്കാനായിരുന്നു തന്‍റെ ലക്ഷ്യമെന്നും തനിക്കു മരണത്തെ ഭയമില്ലെന്നും ഇയാൾ സൗദി അറേബ്യയിലെ അന്വേഷണ ഉദ്യോഗസ്ഥരോടു വെളിപ്പെടുത്തിയതായി വാൾ സ്ട്രീറ്റ് ജേർണൽ റിപ്പോർട്ട് ചെയ്തു.
സൗദിയിൽനിന്ന് നിലവിൽ ഇയാളെ യുഎഇയിലെത്തിച്ചു വിശദമായി ചോദ്യം ചെയ്തുവരികയാണ്. ഒമാൻ പൗരന്‍റെയും സിറിയൻ പൗരയായ അമ്മയുടെയും മകനായ ഹമ്മാമി യുഎഇയിലാണു ജനിച്ചത്. സിറിയൻ ആഭ്യന്തരയുദ്ധകാലത്ത് സിറിയയിൽ കഴിഞ്ഞിരുന്നു. ഇവിടെവച്ചാണു തീവ്രവാദ ആശയങ്ങളിലേക്ക് ആകൃഷ്‌ടനായതെന്ന് കരുതപ്പെടുന്നു. ഒമാൻ എയറിൽ ജോലി ചെയ്തിരുന്ന സമയത്ത് തീവ്രവാദ വെബ്‌‌സൈറ്റുകൾ പതിവായി സന്ദർശിച്ചതിനെത്തുടർന്ന് ഇയാളെ വിമാനം പറത്തുന്നതിൽനിന്ന് ഒമാൻ വിലക്കിയിരുന്നു. തുടർന്ന് തീവ്രവാദ ആശയങ്ങളിൽനിന്നു മുക്തനാക്കാനുള്ള കൗൺസലിംഗിനുശേഷം ഇയാൾക്കു ഡെസ്ക് ജോലി നൽകുകയായിരുന്നു.
എന്നാൽ ഇതിനുശേഷം ഇയാൾ ഈ വർഷം ഫെബ്രുവരിയിൽ ഫ്ലൈ ദുബായിൽ ജോലിയിൽ പ്രവേശിക്കുകയായിരുന്നു. ഒമാനിൽ വിലക്കുണ്ടായിരുന്ന ഇയാൾക്കു വിമാനക്കമ്പനി എങ്ങനെ ജോലി നൽകിയെന്നതിൽ വൻ സുരക്ഷാവീഴ്ച ആരോപിക്കപ്പെടുന്നുണ്ട്. സംഭവത്തിൽ വിദേശ ബന്ധങ്ങൾ ഉണ്ടോ എന്നതടക്കമുള്ള കാര്യങ്ങൾ യുഎഇ, സൗദി, ഇസ്രയേൽ ഏജൻസികൾ സംയുക്തമായി അന്വേഷിച്ചുവരികയാണ്.
സഹപൈലറ്റിനെ പ്രശംസിച്ച് അൽക്വയ്ദ
ഫ്ലൈ ദുബായ് വിമാനം തട്ടിയെടുക്കാൻ ശ്രമിച്ച ഒമാനി സഹപൈലറ്റിന്‍റെ നടപടിയെ പ്രശംസിച്ച് ഭീകരസംഘടനയായ അൽക്വയ്ദ. അമേരിക്കൻ, ഇസ്രേലി വിമാനങ്ങൾക്കുനേരേ ഇനിയും ആക്രമണങ്ങൾ നടത്താൻ സംഘടന ആഹ്വാനം ചെയ്തു. അൽക്വയ്ദയുടെ യെമൻ ഘടകമായ എക്യുഎപി തങ്ങളുടെ പ്രതിവാരപത്രികയായ അൽ ബയാനിലൂടെയാണ് പ്രസ്താവന പുറത്തിറക്കിയത്.
‘സെപ്റ്റംബർ 11നും സെപ്റ്റംബർ 30നും ഇടയിൽ’എന്ന തലക്കെട്ടോടെ പ്രസിദ്ധീകരിച്ച മുഖപ്രസംഗത്തിൽ, 2001 സെപ്റ്റംബർ 11ലെ വേൾഡ് ട്രേഡ് സെന്‍റർ ആക്രമണത്തിന്‍റെയും സെപ്റ്റംബർ 30ന് ദുബായിൽനിന്ന് ടെൽ അവീവിലേക്കു പോയ ഫ്ലൈ ദുബായ് വിമാനത്തിന്‍റെയും ചിത്രങ്ങൾ ഉൾപ്പെടുത്തിയിട്ടുണ്ട്.
‘യുദ്ധം ഇനിയും അവസാനിച്ചിട്ടില്ല. ഇസ്‌ലാം വിരുദ്ധ ശക്തികളുടെയും സയണിസ്റ്റുകളുടെയും അമേരിക്കക്കാരുടെയും വിമാനങ്ങൾ ഇപ്പോഴും ആകാശത്ത് പറക്കുന്നുണ്ട്. സെപ്റ്റംബർ 11ലും സെപ്റ്റംബർ 30ലും തെളിയിക്കപ്പെട്ടതുപോലെ അവ ഇനിയും ആക്രമിക്കപ്പെടാം’-അറബിയിൽ എഴുതിയ മുഖപ്രസംഗത്തിൽ പറയുന്നു.
സുരക്ഷാവീഴ്ചയിൽ പരസ്പരം പഴിചാരി ഇസ്രയേലും യുഎഇയും
ടെൽ അവീവ്: ദുബായിൽനിന്ന് ഇസ്രയേലിലേക്കു പറന്ന ഫ്ലൈ ദുബായ് വിമാനം തകർക്കാൻ സഹപൈലറ്റ് നടത്തിയ ഭീകരാക്രമണ ശ്രമത്തിൽ വൻ സുരക്ഷാവീഴ്ച ഉണ്ടായതായി റിപ്പോർട്ട്. വിമാനത്തിലുണ്ടായിരുന്ന യാത്രക്കാരുടെയും ജീവനക്കാരുടെയും പൂർണ വിവരങ്ങൾ (പേര്, പൗരത്വം എന്നിവയുൾപ്പടെ) വിമാനം പുറപ്പെടുന്നതിന് മുന്പുതന്നെ യുഎഇ ഇസ്രയേലിനു കൈമാറിയിരുന്നുവെന്ന് മുതിർന്ന ഉദ്യോഗസ്ഥൻ വെളിപ്പെടുത്തി. ഇതോടെ തീവ്രവാദ പശ്ചാത്തലമുള്ള പൈലറ്റിനെ തിരിച്ചറിയുന്നതിൽ വലിയ വീഴ്ച സംഭവിച്ചതിനെച്ചൊല്ലി ആരോപണ-പ്രത്യാരോപണങ്ങൾ ശക്തമായി.
തീവ്രവാദ നിലപാടുകളുടെ പേരിൽ സ്വന്തം രാജ്യമായ ഒമാൻ വിമാനം പറത്തുന്നതിൽനിന്ന് വിലക്കേർപ്പെടുത്തിയ സഹപൈലറ്റ് ഹമാം അൽ ഹമ്മാമിയാണ് ആക്രമണം നടത്തിയത്. ഇസ്രയേലുമായി നയതന്ത്രബന്ധമില്ലാത്ത ഒമാനിലെ പൗരനായ ഇയാൾ ഇസ്രയേൽ പൗരന്മാരുമായി പറന്ന വിമാനത്തിന്‍റെ നിയന്ത്രണം ഏറ്റെടുക്കാൻ എങ്ങനെ അനുവദിക്കപ്പെട്ടു എന്നതിൽ ഇനിയും വ്യക്തത വന്നിട്ടില്ല.
അതിനിടെ, ഇസ്രയേലിലെ ആഭ്യന്തര സുരക്ഷാ ഏജൻസിയായ ഷിൻ ബെറ്റും ട്രാൻസ്പോർട്ട് മന്ത്രാലയവും സുരക്ഷാപരിശോധനയുടെ ഉത്തരവാദിത്വത്തെച്ചൊല്ലി പരസ്പരം പഴിചാരുകയാണ്. വിദേശ വിമാനങ്ങളിലെ യാത്രക്കാരുടെയും ജീവനക്കാരുടെയും വിവരങ്ങൾ പരിശോധിക്കേണ്ടതു ഗതാഗത മന്ത്രാലയമാണെന്ന് ഷിൻ ബെറ്റ് ആരോപിച്ചപ്പോൾ, അത്തരം പട്ടികകളോ സുരക്ഷാ മുന്നറിയിപ്പുകളോ തങ്ങൾക്കു ലഭിച്ചിട്ടില്ലെന്ന് ട്രാൻസ്പോർട്ട് മന്ത്രി മിരി റെഗെവ് പ്രതികരിച്ചു.
ഇസ്രയേലുമായി നയതന്ത്രബന്ധമില്ലാത്ത രാജ്യങ്ങളിലെ പൗരന്മാരായ പൈലറ്റുമാർ വിമാനം പറത്തുന്നത് തടയാൻ വിദേശ വിമാനക്കമ്പനികളുമായി കരാറുകളുണ്ടെന്ന് ഇസ്രയേൽ പ്രധാനമന്ത്രി ബെഞ്ചമിൻ നെതന്യാഹു വ്യക്തമാക്കി. യുഎഇയുടെ നേതൃത്വത്തിൽ അന്വേഷണം പുരോഗമിക്കുമ്പോഴും ഇത്തരം അന്താരാഷ്ട്ര സുരക്ഷാപരിശോധനകളിലെ അപകാതകൾ വ്യോമയാന മേഖലയിൽ വൻ ആശങ്കയ്ക്കു വഴിവച്ചിട്ടുണ്ട്.
إرسال تعليق