കിങ് ഖാലിദ് വിമാനത്താവളത്തിൽ വീണ്ടും ആക്രമണം, സ്ഥിരീകരിച്ച് സൗദി, അപലപിച്ച് നെതന്യാഹു; ഇന്നലത്തെ ആക്രമണത്തിൽ 12 മരണം, 11 ഇന്ത്യാക്കാർക്ക് പരിക്ക്
റിയാദ്: സൗദി അറേബ്യയിലെ റിയാദ് കിങ് ഖാലിദ് അന്താരാഷ്ട്ര വിമാനത്താവളത്തിൽ വീണ്ടും ആക്രമണം. 12 പേർ കൊല്ലപ്പെട്ട ഇന്നലത്തെ ഹൂത്തികളുടെ ആക്രമണത്തിന് ശേഷം ഇന്ന് വൈകിട്ടോടെയാണ് വീണ്ടും ആക്രമണം ഉണ്ടായത്. പാസഞ്ചർ ടെർമിനൽ നാലിന് നേരെയാണ് ആക്രമണം ഉണ്ടായത്. ഇക്കാര്യം സൗദി അറേബ്യൻ സേന സ്ഥിരീകരിച്ചു. ഒരു മിസൈൽ തകർത്തു എന്നും തീപ്പിടുത്തം അണച്ചു എന്നും സൗദി സേന അറിയിച്ചു. ഇന്നലത്തെ ആക്രമണത്തിന് പിന്നാലെ വീണ്ടും ആക്രമണം ഉണ്ടാകുമെന്ന് നേരത്തെ ഹൂത്തികൾ ഭീഷണി മുഴക്കിയിരുന്നു. സൗദിയിൽ വീണ്ടും ആക്രമണം നടത്തുമെന്നും വിമാനത്താവളങ്ങളും തുറമുഖങ്ങളും ആക്രമിക്കുമെന്നുമായിരുന്നു ഹൂത്തികളുടെ മുന്നറിയിപ്പ്. യാത്രക്കാർ, ജീവനക്കാർ ഉൾപ്പടെ ഉള്ളവർക്കാണ് മുന്നറിയിപ്പ് നൽകിയത്. രൂക്ഷമായ ആക്രമണം ഉണ്ടാകുമെന്നും ഹൂത്തികൾ വ്യക്തമാക്കിയിരുന്നു. ഇതിന് പിന്നാലെ വീണ്ടും ആക്രമണം നടന്നതോടെ ശക്തമായ തിരിച്ചടിക്ക് സൗദി സേന തയ്യാറെടുക്കുകയാണെന്നാണ് റിപ്പോർട്ടുകൾ.
ഇന്നലത്തെ ആക്രമണത്തിൽ 12 മരണം, 11 ഇന്ത്യാക്കാർക്ക് പരിക്ക്
അതേസമയം റിയാദ് കിങ് ഖാലിദ് അന്താരാഷ്ട്ര വിമാനത്താവളത്തിൽ ഹൂത്തികൾ ഇന്നലെ നടത്തിയ ആക്രമണത്തിൽ 12 പേർ കൊല്ലപ്പെടുകയും 309 പേർക്ക് പരിക്കേൽക്കുകയും ചെയ്തിരുന്നു. മേഖലയിൽ ഈ യുദ്ധമുണ്ടായ ശേഷം ഒരു അറബ് - ഗൾഫ് രാജ്യത്തുണ്ടാകുന്ന ഏറ്റവും വലിയ ആൾനാശവും പരിക്കുകളും നാശനഷ്ടവുമുണ്ടായ ആക്രമണമാണ് ഇന്നലെ റിയാദിൽ ഹൂത്തികൾ നടത്തിയത്. നാല് സൗദി പൗരന്മാരും എട്ട് വിദേശികളുമാണ് കൊല്ലപ്പെട്ടത്. ഇതിൽ അമേരിക്ക, ജോർദാൻ, ഈജിപ്ത്, സിറിയ, പലസ്തീൻ, സുഡാൻ, ബംഗ്ലദേശ് എന്നീ രാജ്യങ്ങളുടെ പൗരന്മാരാണുള്ളത്. പരിക്കേറ്റ പലരുടെയും നില ഗുരുതരമാണ്. പരിക്കേറ്റവരിൽ 11 ഇന്ത്യാക്കാരുണ്ടെന്നതാണ് ഏറ്റവും പുതിയ വിവരം. അതേസമയം ദമാം കിങ് അന്താരാഷ്ട്ര വിമാനത്താവളത്തിന് നേരയും ആക്രമണശ്രമമുണ്ടായിരുന്നു. മിസൈൽ ആവശിഷ്ടം വിമാനത്താവള പരിസരത്ത് വീണു. അൽഖർജിലും കിഴക്കൻ മേഖലയിലും ആക്രമണ ശ്രമമുണ്ടായി. ആക്രമണങ്ങളെ ഐക്യരാഷ്ട്ര സഭാ സെക്രട്ടറി ജനറലും രാഷ്ട്ര നേതാക്കളും അപലപിച്ചു. ഹൂത്തികളുടേത് സമ്പൂർണ യുദ്ധക്കുറ്റമാണെന്ന് കാട്ടി കാട്ടി സൗദി തിരിച്ചടി ശക്തമാക്കി.
അപലപിച്ച് ഇസ്രയേൽ
അതിനിടെ റിയാദിലേക്ക് നടന്ന അക്രമണങ്ങളെ അപലപിച്ച് ഇസ്രായേൽ പ്രധാനമന്ത്രി ബെഞ്ചമിൻ നെതന്യാഹു രംഗത്തെത്തി. തീവ്രവാദത്തെ ഒറ്റക്കെട്ടായി ശക്തമായി നേരിടണം എന്ന് നെതന്യാഹു ആഹ്വാനം ചെയ്തു. ശക്തമായ മിഡിൽ ഈസ്റ്റ് ആണ് ഇസ്രായേൽ ആഗ്രഹിക്കുന്നത് എന്നും നെതന്യാഹു കൂട്ടിച്ചേർത്തു.
Post a Comment