പൊലീസ് സേനയില് വൻ അഴിച്ചുപണി; പി. വിജയനും ഷൗക്കത്തലിക്കും ഉള്പ്പെടെ നിര്ണായക പദവികള്!
സംസ്ഥാന പൊലീസ് സേനയില് വൻ അഴിച്ചുപണി. എഡിജിപി തലം മുതല് എസ്പിമാർ വരെയുള്ള 30 മുതിർന്ന ഐപിഎസ് ഉദ്യോഗസ്ഥരെയാണ് ഒരേസമയം സ്ഥലംമാറ്റിയത്.
മുൻ ഭരണകൂടങ്ങള് തഴയുകയോ മാറ്റിനിർത്തുകയോ ചെയ്ത പ്രമുഖ ഉദ്യോഗസ്ഥർക്ക് നിർണായക പദവികള് നല്കിക്കൊണ്ടാണ് പുതിയ ക്രമീകരണം. ക്രമസമാധാന ചുമതലയുള്ള പുതിയ എഡിജിപി ആയി പി. വിജയനെ നിയമിച്ചതാണ് ഈ അഴിച്ചുപണിയിലെ ഏറ്റവും പ്രധാനപ്പെട്ട മാറ്റം. നിലവില് ഇന്റലിജൻസ് വിഭാഗം മേധാവിയായിരുന്ന അദ്ദേഹത്തിന് സൈബർ സെല്ലിന്റെ അധിക ചുമതലയും സർക്കാർ കൈമാറിയിട്ടുണ്ട്.
എഡിജിപി, ഐജി, ഡിഐജി തലങ്ങളിലെ പ്രധാന മാറ്റങ്ങള്
പൊലീസ് ആസ്ഥാനത്തെ ചുമതലയില് നിന്ന് എഡിജിപി എസ്. ശ്രീജിത്തിനെ മാറ്റി ജയില് എഡിജിപി ആയി നിയമിച്ചു. ജയില് മേധാവിയായിരുന്ന ബല്റാം കുമാർ ഉപാധ്യായയെ സായുധ പൊലീസ് ബറ്റാലിയൻ എഡിജിപി ആയാണ് മാറ്റിനിയമിച്ചത്. എച്ച്. വെങ്കിടേഷിന് ക്രൈംബ്രാഞ്ച് എഡിജിപിയുടെ പൂർണ്ണ ചുമതല നല്കിയപ്പോള്, ദിനേന്ദ്ര കശ്യപിനെ ഇന്റലിജൻസ് എഡിജിപിയായും നിയമിച്ചു.
ഐജി തലത്തിലും വലിയ മാറ്റങ്ങളുണ്ട്. ഹർഷിത അത്തല്ലൂരിയെ ഹെഡ്ക്വാർട്ടേഴ്സ് ഐജി ആയും, ആർ. നിശാന്തിനിയെ ഇന്റലിജൻസ് വിഭാഗം ഐജി ആയും നിയമിച്ചു. എസ്. ശ്യാംസുന്ദറിനെ പുതുതായി രൂപീകരിച്ച ക്രൈംബ്രാഞ്ച് എക്സ്-കേഡർ പോസ്റ്റിലേക്ക് ഐജി ആയി നിയമിച്ചിട്ടുണ്ട്. ഡിഐജി തലത്തില്, ഏറെ ശ്രദ്ധേയനായ യതീഷ് ചന്ദ്രയെ കണ്ണൂർ റേഞ്ചില് നിന്ന് മാറ്റി എറണാകുളം റേഞ്ച് ഡിഐജി ആക്കി. തിരുവനന്തപുരം സിറ്റി പൊലീസ് കമ്മീഷണർ സ്ഥാനത്തുനിന്ന് കാർത്തിക്കിനെ മാറ്റി തൃശൂർ റേഞ്ച് ഡിഐജി ആക്കിയപ്പോള്, തൃശൂർ റേഞ്ച് ഡിഐജി ആയിരുന്ന നാരായണൻ ടി.യെ കണ്ണൂർ റേഞ്ച് ഡിഐജി ആയും നിയമിച്ചു. എറണാകുളം റേഞ്ച് ഡിഐജി പദവിയില് നിന്നുമാണ് ഡോ. അരുള് ആർ.ബി. കൃഷ്ണയെ തിരുവനന്തപുരം സിറ്റി പൊലീസ് കമ്മീഷണറായി നിയമിച്ചിരിക്കുന്നത്.
കമ്മീഷണർ, ജില്ലാ പൊലീസ് മേധാവി തലത്തിലെ മാറ്റങ്ങള്
ടി.പി. ചന്ദ്രശേഖരൻ വധക്കേസ് അന്വേഷണത്തിന് മേല്നോട്ടം വഹിച്ച പ്രമുഖ ഉദ്യോഗസ്ഥനായ ഷൗക്കത്തലി എ.പിയെ കോഴിക്കോട് സിറ്റി പൊലീസ് കമ്മീഷണറായി നിയമിച്ചു. ഐപിഎസ് ലഭിച്ച് വർഷങ്ങള്ക്ക് ശേഷമാണ് ഷൗക്കത്തലിക്കും കൊല്ലം റൂറല് ജില്ലാ പൊലീസ് മേധാവിയായി നിയമിതനായ ഷാജി സുഗുണനും ക്രമസമാധാന ചുമതല ലഭിക്കുന്നത്.
മറ്റ് പ്രധാന ജില്ലാ പൊലീസ് മേധാവിമാരുടെ പട്ടിക താഴെ
മെറിൻ ജോസഫ്: കോഴിക്കോട് റൂറല് ജില്ലാ പൊലീസ് മേധാവി
പ്രശാന്തൻ കാണി ബി.കെ: തിരുവനന്തപുരം റൂറല് ജില്ലാ പൊലീസ് മേധാവി
സാബു മാത്യു കെ.എം: കോട്ടയം ജില്ലാ പൊലീസ് മേധാവി
വിഷ്ണു പ്രദീപ് ടി.കെ: ആലപ്പുഴ ജില്ലാ പൊലീസ് മേധാവി
അബ്ദുല് റഷീദ് എ: പാലക്കാട് ജില്ലാ പൊലീസ് മേധാവി
എസ്. ദേവ മനോഹർ: വയനാട് ജില്ലാ പൊലീസ് മേധാവി
നിതിൻരാജ് പി: കാസർകോട് ജില്ലാ പൊലീസ് മേധാവി
ബി.വി. വിജയ ഭാരത് റെഡ്ഡി: കണ്ണൂർ സിറ്റി പൊലീസ് കമ്മീഷണർ
മുഹമ്മദ് നദീമുദ്ദീൻ: തൃശൂർ റൂറല് ജില്ലാ പൊലീസ് മേധാവി
ഉമേഷ് ഗോയല്: കണ്ണൂർ റൂറല് ജില്ലാ പൊലീസ് മേധാവി
ഡോ. നസീം എ: ഇടുക്കി ജില്ലാ പൊലീസ് മേധാവി
ബി. കൃഷ്ണകുമാർ: റെയില്വേ എസ്.പി
ഇതുകൂടാതെ അനുജ് പാലിവാല് (എ.ഐ.ജി, ലോ & ഓർഡർ, പൊലീസ് ആസ്ഥാനം), ഫറാഷ് ടി (എ.ഐ.ജി, എറണാകുളം കോസ്റ്റല് പൊലീസ്), മോഹനചന്ദ്രൻ നായർ എം.പി (കോഴിക്കോട്, വയനാട് ക്രൈംബ്രാഞ്ച് എസ്.പി), സി.എസ്. ഷാഹുല് ഹമീദ് (തിരുവനന്തപുരം ക്രൈംബ്രാഞ്ച് സെൻട്രല് യൂണിറ്റ്-1 എസ്.പി) എന്നിവർക്കും പുതിയ ചുമതലകള് നല്കി.
ഭരണപരമായ ആവശ്യങ്ങള്ക്കായി ക്രൈംബ്രാഞ്ച് ഐ.ജി, തിരുവനന്തപുരം സിറ്റി പൊലീസ് കമ്മീഷണർ, കോഴിക്കോട് സിറ്റി പൊലീസ് കമ്മീഷണർ, പൊലീസ് ആസ്ഥാനത്തെ എ.ഐ.ജി (ലോ & ഓർഡർ) എന്നീ നാല് തസ്തികകള് താല്കാലിക എക്സ്-കേഡർ തസ്തികകളായി ഒരു വർഷത്തേക്ക് പുതുതായി സൃഷ്ടിച്ചതായും സർക്കാർ ഉത്തരവില് വ്യക്തമാക്കുന്നു.
Post a Comment