അപകട പശ്ചാത്തലത്തില് തൃശൂര് പൂരം വെടിക്കെട്ടില്ലാതെ നടത്താന് ആലോചന; കേന്ദ്ര- സംസ്ഥാന സര്ക്കാരുകള് തീരുമാനമെടുക്കട്ടെയെന്ന് ദേവസ്വം
തൃശൂര് മുണ്ടത്തിക്കോട് വെടിക്കെട്ട് പുരയിലുണ്ടായ സ്ഫോടനത്തില് 13 പേര് മരിച്ച പശ്ചാത്തലത്തില് തൃശൂര് പൂരം വെടിക്കെട്ടില്ലാതെ നടത്താന് ആലോചന. സര്ക്കാരുകള് തീരുമാനിക്കട്ടെയെന്ന നിലപാടിലാണ് ദേവസ്വം. തുടര്നടപടികള് കേന്ദ്ര, സംസ്ഥാന സര്ക്കാരുകള് തീരുമാനിക്കട്ടെ എന്ന നിലപാടാകും തിരുവമ്പാടി ദേവസ്വം കൈക്കൊള്ളുക. പാറമേക്കാവുമായും ഇക്കാര്യത്തില് കൂടിയാലോചന നടത്തും.
വെടിക്കെട്ട് പൂര്ണമായും ഒഴിവാക്കണമെന്ന നിര്ദേശം സര്ക്കാരിന്റെ ഭാഗത്തുനിന്നുണ്ടായാല് അക്കാര്യത്തില് ദേവസ്വങ്ങള് കൂടിയാലോചന നടത്തി തീരുമാനമെടുക്കും. മരിച്ചവരുടെ സംസ്കാരത്തിനും സഹായം എത്തിക്കുന്നതിനും മുന്ഗണനയെന്നാണ് ദേവസ്വം അധികൃതര് അറിയിച്ചത്.
സ്ഫോടനത്തില് മരിച്ച 13 പേരില് 9 പേരെ തിരിച്ചറിഞ്ഞു. പരുക്കേറ്റ് 13 പേരാണ് ചികിത്സയിലുള്ളത്. ഇതില് പത്തു പേര് തീവ്രപരിചരണ വിഭാഗത്തിലും രണ്ട് പേര് വെന്റിലേറ്ററിലുമാണ്. അഞ്ച് മൃതദേഹങ്ങള് പോസ്റ്റ്മാര്ട്ടം പൂര്ത്തിയാക്കി വിട്ടുനല്കി. ബാബു (56), സുഭദ്ര (68), അനിത (50), അഖില് (30), പഴയന്നൂര് സ്വദേശി വിദ്യകുമാര് (48), വേലൂര് സ്വദേശി സാജന് (38), വിഷ്ണു (30), പ്രവീണ് (45), രജീഷ് (40), ഹരി (40), ഭവാനി (65), സുന്ദരന് (46), എന്നിവരാണ് പരുക്കേറ്റ് ചികിത്സയില് കഴിയുന്നത്.
إرسال تعليق