ജോലി സമയം കഴിഞ്ഞാൽ കോൾ എടുക്കേണ്ട, ഇ-മെയിൽ നോക്കേണ്ട; ഇതടക്കം സുപ്രധാനമായ ബില്ലുകൾ ലോക്സഭയിൽ, വധശിക്ഷ നിർത്തലാക്കണമെന്ന് കനിമൊഴി

ജോലി സമയം കഴിഞ്ഞാൽ കോൾ എടുക്കേണ്ട, ഇ-മെയിൽ നോക്കേണ്ട; ഇതടക്കം സുപ്രധാനമായ ബില്ലുകൾ ലോക്സഭയിൽ, വധശിക്ഷ നിർത്തലാക്കണമെന്ന് കനിമൊഴി

ദില്ലി: ഓഫീസ് സമയത്തിന് ശേഷം ജോലിയുമായി ബന്ധപ്പെട്ട കോളുകളും ഇമെയിലുകളും ശ്രദ്ധിക്കുന്നതിൽ നിന്ന് ജീവനക്കാർക്ക് വിട്ടുനിൽക്കാൻ അനുമതി നൽകുന്ന ഒരു പ്രൈവറ്റ് മെമ്പർ ബിൽ വെള്ളിയാഴ്ച ലോക്സഭയിൽ അവതരിപ്പിച്ചു. എംപിമാർക്ക് സർക്കാർ നിയമനിർമ്മാണം ആവശ്യമുള്ള വിഷയങ്ങളിൽ ബില്ലുകൾ അവതരിപ്പിക്കാൻ സാധിക്കും. എങ്കിലും, മിക്ക കേസുകളിലും സർക്കാരിന്‍റെ പ്രതികരണത്തിന് ശേഷം ഇത്തരം ബില്ലുകൾ പിൻവലിക്കുകയാണ് പതിവ്.

റൈറ്റ് ടൂ ഡിസ്കണക്ട്

എൻസിപി എംപി സുപ്രിയ സുലെ അവതരിപ്പിച്ച 'റൈറ്റ് ടു ഡിസ്കണക്ട് ബിൽ' ഒരു തൊഴിലാളി ക്ഷേമ അതോറിറ്റി സ്ഥാപിക്കാൻ ലക്ഷ്യമിടുന്നു. ഔദ്യോഗിക സമയത്തിന് ശേഷവും അവധി ദിവസങ്ങളിലും ജോലിയുമായി ബന്ധപ്പെട്ട കോളുകളിൽ നിന്നും ഇമെയിലുകളിൽ നിന്നും ഒഴിഞ്ഞ് നിൽക്കാനുള്ള അവകാശം ഓരോ ജീവനക്കാരനും നൽകണമെന്ന് ബിൽ നിർദ്ദേശിക്കുന്നു. കൂടാതെ, അത്തരം ആശയവിനിമയങ്ങളോട് പ്രതികരിക്കുന്നത് നിരസിക്കാനുള്ള വ്യവസ്ഥകളും അനുബന്ധ വിഷയങ്ങളും ബില്ലിൽ ഉൾപ്പെടുന്നു.

ആർത്തവാനുകൂല്യ ബില്ലുകൾ

കോൺഗ്രസ് എംപി കാദിയം കാവ്യ അവതരിപ്പിച്ച മെൻസ്ട്രുവൽ ബെനിഫിറ്റ്‌സ് ബിൽ ആർത്തവസമയത്ത് സ്ത്രീകൾക്ക് ജോലിസ്ഥലത്ത് സൗകര്യങ്ങളും പിന്തുണയും നൽകാൻ ലക്ഷ്യമിടുന്നു. വനിതാ ജീവനക്കാർക്ക് ആർത്തവ സമയത്ത് പ്രത്യേക ആനുകൂല്യങ്ങൾ ഉറപ്പാക്കുന്ന ഒരു നിയമപരമായ ചട്ടക്കൂട് സ്ഥാപിക്കാനും ഈ ബിൽ ശ്രമിക്കുന്നു. എൽജെപി എംപി ശാംഭവി ചൗധരിയും സമാനമായ ഒരു നിയമനിർമ്മാണം അവതരിപ്പിച്ചു. ജോലി ചെയ്യുന്ന സ്ത്രീകൾക്ക് ശമ്പളത്തോടുകൂടിയ ആർത്തവ അവധി ഉറപ്പാക്കുക, ഒപ്പം ആർത്തവ ശുചിത്വ സൗകര്യങ്ങളും മറ്റ് ആരോഗ്യ ആനുകൂല്യങ്ങളും ലഭ്യമാക്കുക എന്നിവയാണ് ഇതിന്‍റെ ലക്ഷ്യം.

നീറ്റ് ഒഴിവാക്കാനുള്ള ബിൽ

മെഡിക്കൽ പ്രവേശനത്തിനുള്ള ദേശീയ യോഗ്യതാ പ്രവേശന പരീക്ഷയായ നീറ്റിൽ നിന്ന് തമിഴ്‌നാടിനെ ഒഴിവാക്കുന്നതിനുള്ള ബിൽ കോൺഗ്രസ് എംപി മാണിക്കം ടാഗോർ അവതരിപ്പിച്ചു. നീറ്റ് അടിസ്ഥാനമാക്കിയുള്ള പ്രവേശനത്തിൽ നിന്ന് സംസ്ഥാനത്തെ ഒഴിവാക്കുന്ന നിയമത്തിന് രാഷ്ട്രപതി അംഗീകാരം നൽകാത്തതിനെത്തുടർന്ന് കഴിഞ്ഞ മാസം തമിഴ്‌നാട് സർക്കാർ സുപ്രീം കോടതിയെ സമീപിച്ചിരുന്നു.

വധശിക്ഷ നിർത്തലാക്കൽ

ഇന്ത്യയിൽ വധശിക്ഷ നിർത്തലാക്കാനുള്ള ബിൽ ഡിഎംകെ എംപി കനിമൊഴി കരുണാനിധി അവതരിപ്പിച്ചു. വധശിക്ഷ നിർത്തലാക്കണമെന്ന് ആവർത്തിച്ച് ആവശ്യമുയർന്നിട്ടുണ്ടെങ്കിലും, ചില കേസുകളിൽ അത് ഒരു പ്രതിരോധമായി ആവശ്യമാണെന്ന് തുടർച്ചയായ കേന്ദ്ര സർക്കാരുകൾ നിലപാടെടുത്തിട്ടുണ്ട്. ഒരു പതിറ്റാണ്ട് മുമ്പ് നിയമ കമ്മീഷൻ, ജീവപര്യന്തം തടവിനേക്കാൾ ശക്തമായ പ്രതിരോധ ലക്ഷ്യം വധശിക്ഷ നൽകുന്നില്ല എന്ന് ചൂണ്ടിക്കാട്ടി, തീവ്രവാദവുമായി ബന്ധപ്പെട്ട കേസുകൾ ഒഴികെയുള്ളവയിൽ വധശിക്ഷ ഘട്ടം ഘട്ടമായി നിർത്തലാക്കാൻ ശുപാർശ ചെയ്തിരുന്നു.

മാധ്യമപ്രവർത്തകരുടെ സംരക്ഷണം

മാധ്യമപ്രവർത്തകർക്കെതിരായ അതിക്രമങ്ങൾ തടയുന്നതിനും മാധ്യമപ്രവർത്തകർക്കും അവരുടെ സ്വത്തുക്കൾക്കും സംരക്ഷണം നൽകുന്നതിനും ലക്ഷ്യമിട്ടുള്ള ജേണലിസ്റ്റ് (പ്രിവൻഷൻ ഓഫ് വയലൻസ് ആൻഡ് പ്രൊട്ടക്ഷൻ) ബിൽ, സ്വതന്ത്ര എംപി വിശാൽദാദ പ്രകാശ്ബാപ്പു പാട്ടീൽ അവതരിപ്പിച്ചു.