ചൈന: നാലു വയസ്സുകാരിയുടെ വയറില് നിന്ന് 61 മാഗ്നറ്റിക് മുത്തുകള് നീക്കം ചെയ്ത് ഡോക്ടര്മാര്. കുട്ടിയുടെ വയറിലെ ഒരു ഡസനിലധികം ദ്വാരങ്ങളും ഡോക്ടര്മാര് അടച്ചു. മുത്തുകള് കുട്ടിയുടെ കുടലിന്റെ ഭിത്തിയില് ഒട്ടിപ്പിച്ച നിലയിലായിരുന്നു. സോയാബീന്സിന് സമാനമായ വലിപ്പം ബീഡുകള്ക്കുണ്ടായിരുന്നു എന്നും ഡോക്ടര്മാര് പറഞ്ഞു. കഴിഞ്ഞ ഒരു മാസമായി പെണ്കുട്ടിക്ക് വയറുവേദന അനുഭവപ്പെട്ടിരുന്നു. ഷെജിയാങ് പ്രവിശ്യയിലെ ഹാങ്ഷൂ ആശുപത്രിയിലെ ഡോക്ടര്മാര് നടത്തിയ എക്സ്-റേ പരിശോധനയിലാണ് വേദനയുടെ കാരണം കണ്ടെത്തിയത്. മൂന്ന് മണിക്കൂർ നീണ്ട ശസ്ത്രക്രിയയ്ക്ക് ശേഷമാണ് മുത്തുകൾ പുറത്തെടുത്തത്.
മറ്റ് ചികിത്സകളൊന്നും ഫലിക്കാതെ വന്നപ്പോഴാണ് ശസ്ത്രക്രിയ നടത്തിയതെന്ന് ഷെജിയാങ് യൂണിവേഴ്സിറ്റി സ്കൂള് ഓഫ് മെഡിസിന് ചില്ഡ്രന്സ് ആശുപത്രിയിലെ ഡോ ചെന് ക്വിംഗ്ജിയാങ് പറഞ്ഞു. പെണ്കുട്ടി വിഴുങ്ങിയ മാഗ്നറ്റിക് മുത്തുകള് കുട്ടിയുടെ കുടലിന്റെ ഭാഗങ്ങളില് പറ്റിപ്പിടിച്ചിരിക്കുകയും സുഷിരങ്ങള് ഉണ്ടാക്കുകയും ചെയ്തിട്ടുണ്ട്. ഇത്തരത്തില് 14 ദ്വാരങ്ങളാണ് പെണ്കുട്ടിയുടെ കുടലില് കണ്ടെത്തിയതെന്ന് ഡോ. ക്വിംഗ്ജിയാങ് പറയുന്നു. കുട്ടി ഇപ്പോള് സുഖം പ്രാപിച്ചുവരികയാണെന്നും എന്നാല് ഭാവിയില് കുടലില് ചില തടസ്സങ്ങള് ഉണ്ടാകാനുള്ള സാധ്യത കൂടുതലാണെന്നും ഡോക്ടര്മാര് പറയുന്നു.
إرسال تعليق