വിമാനയാത്രയെ വെല്ലുന്ന ആഡംബരവുമായി ആനവണ്ടി; കെഎസ്ആർടിസിയുടെ ബിസിനസ് ക്ലാസ് ബസ് സോഷ്യൽ മീഡിയയിൽ തരംഗമാകുന്നു!
തിരുവനന്തപുരം: റോഡ് യാത്രയിൽ ഇനി വിമാനയാത്രയുടെ സുഖവും ആഡംബരവും അനുഭവിക്കാം. കെഎസ്ആർടിസി പുതുതായി പുറത്തിറക്കിയ പ്രീമിയം ബിസിനസ് ക്ലാസ് ബസ് സർവീസിന്റെ ദൃശ്യങ്ങൾ സോഷ്യൽ മീഡിയയിൽ വൈറലാകുന്നു. വ്ലോഗർ അജയ് ജോണി പങ്കുവെച്ച വീഡിയോയിലൂടെയാണ് ബസിലെ ആഡംബര സൗകര്യങ്ങൾ പുറത്തുവന്നത്. തിരുവനന്തപുരം – കൊച്ചി റൂട്ടിലാണ് (ഏകദേശം 200-227 കി.മീ) ഈ ഹൈ-എൻഡ് സർവീസ് പ്രവർത്തിക്കുന്നത്.
“ഇനി ബിസിനസ് ക്ലാസ് സൗകര്യം അന്താരാഷ്ട്ര വിമാനങ്ങളിൽ മാത്രമല്ല, കെഎസ്ആർടിസി ബസുകളിലും ലഭ്യമാണ്” എന്ന് വീഡിയോയിൽ വ്ലോഗർ വ്യക്തമാക്കുന്നു.പ്രധാന സൗകര്യങ്ങൾ:ആഡംബര ഇരിപ്പിടങ്ങൾ: പ്ലഷ് ലെതർ സീറ്റുകളും ഓരോ യാത്രക്കാരനും വ്യക്തിഗത എന്റർടെയ്മെന്റ് സ്ക്രീനുകളും.
സൗജന്യ വൈഫൈ , ചാർജിംഗ് പോർട്ടുകൾ, യാത്രക്കാരെ സഹായിക്കാനായി പ്രത്യേകം നിയോഗിക്കപ്പെട്ട ബസ് ഹോസ്റ്റസ്. ചൂടുള്ള പാനീയങ്ങളും ഷവർമ റോൾ അടക്കമുള്ള ലഘുഭക്ഷണങ്ങളും യാത്രക്കാർക്ക് വിതരണം ചെയ്യുന്നു.
ശുചിത്വവും വൃത്തിയുമുള്ള ഇൻ-ബിൽറ്റ് വാഷ്റൂം സംവിധാനം. ഇന്ത്യൻ റെയിൽവേ ചീഫ് പ്രോജക്ട് മാനേജർ അനന്ത് രൂപനഗുഡി ഉൾപ്പെടെ നിരവധി പ്രമുഖർ ഈ സേവനത്തെ പ്രശംസിച്ച് രംഗത്തെത്തിയിട്ടുണ്ട്. ദീർഘദൂര യാത്രകളെ കൂടുതൽ സുഖകരവും സൗകര്യപ്രദവുമാക്കുന്ന കെഎസ്ആർടിസിയുടെ ഈ പുതിയ മാറ്റത്തിന് മികച്ച പ്രതികരണമാണ് ജനങ്ങളിൽ നിന്ന് ലഭിക്കുന്നത്.
Post a Comment