അഞ്ചു മുതല് 17 വയസു വരെയുള്ള കുട്ടികള്ക്ക് സൗജന്യമായി ആധാര് പുതുക്കാം
പത്തനംതിട്ട: അഞ്ചു മുതല് 17 വയസ് വരെയുള്ള കുട്ടികളുടെ ബയോമെട്രിക് വിവരങ്ങള് (വിരലടയാളം, കൃഷ്ണമണി രേഖ, ഫോട്ടോ) സെപ്റ്റംബർ വരെ സൗജന്യമായി എല്ലാ ആധാര് കേന്ദ്രങ്ങളിലും പുതുക്കാം. കൃത്യസമയത്ത് ബയോമെട്രിക്സ് പുതുക്കാത്ത ആധാര് കാര്ഡുകള് താത്കാലികമായി അസാധുവായേക്കാം.
സ്കോളര്ഷിപ്പുകൾ, റേഷന് കാര്ഡില് പേര് ചേര്ക്കൽ, സ്കൂള്, കോളജ് പ്രവേശനം, ഡിജിലോക്കർ, അപാര്, പാന് കാര്ഡ് എന്നിവയ്ക്ക് ആധാര് അത്യാവശ്യമാണ്. സമയബന്ധിതമായി ആധാര് പുതുക്കുന്നതിലൂടെ നീറ്റ്, ജെഇഇ, കീം തുടങ്ങിയ മത്സരപ്പരീക്ഷകള്ക്ക് രജിസ്റ്റര് ചെയ്യുമ്പോള് വിദ്യാര്ഥികള് നേരിടുന്ന ബുദ്ധിമുട്ടുകള് ഒഴിവാക്കാം.
നവജാത ശിശുക്കള്ക്ക് ഉള്പ്പെടെ ആധാറിന് എന്റോള് ചെയ്യാം. പൂജ്യം മുതല് അഞ്ച് വയസുവരെയുള്ള കുട്ടികളുടെ ആധാര് എൻറോള്മെന്റ് സമയത്ത് അവരുടെ ബയോമെട്രിക്സ് (വിരലടയാളം, കൃഷ്ണമണി രേഖ) ശേഖരിക്കുന്നില്ല. മാതാപിതാക്കളുടെ ആധാറുമായി ബന്ധിപ്പിച്ചാണ് കുട്ടികള്ക്ക് ആധാര് നല്കുന്നത്. കുട്ടിയുടെ ജനന സര്ട്ടിഫിക്കറ്റ് മാത്രം ഹാജരാക്കിയാല് മതി.
കുട്ടികള്ക്ക് ഭാവിയില് വിവിധ സര്ക്കാര് ആനുകൂല്യങ്ങള് തടസമില്ലാതെ ലഭിക്കാന് ജനന സര്ട്ടിഫിക്കറ്റ് ലഭിച്ചയുടന് ആധാര് എടുക്കാന് ശ്രമിക്കുക.
ആധാറുമായി ബന്ധിപ്പിച്ച മൊബൈല് നമ്പറിലേക്ക് വരുന്ന ഒടിപിയിലൂടെയാണ് വിവിധ സര്ക്കാര് വകുപ്പുകളുടെ ഓണ്ലൈന് സേവനങ്ങള് ലഭിക്കുന്നത്. നിലവില് ഉപയോഗിക്കുന്ന മൊബൈല് നമ്പറും ഇ-മെയില് ഐഡിയും ആധാറില് ചേര്ത്തിട്ടുണ്ടെന്ന് ഉറപ്പാക്കണം.
Post a Comment