ഇന്ത്യയിലെ ഇറാൻ എംബസിയുടെ പ്രതികരണം; 'മാപ്പർഹിക്കാത്ത കുറ്റകൃത്യത്തിന്റെ പ്രത്യാഘാതം അമേരിക്കയും ഇസ്രായേലും അനുഭവിക്കും'

ഇന്ത്യയിലെ ഇറാൻ എംബസിയുടെ പ്രതികരണം; 'മാപ്പർഹിക്കാത്ത കുറ്റകൃത്യത്തിന്റെ പ്രത്യാഘാതം അമേരിക്കയും ഇസ്രായേലും അനുഭവിക്കും'

ദില്ലി: ഇറാൻ പരമോന്നത നേതാവ് ആയത്തുല്ല ഖമനേയിയുടെ മരണത്തിൽ അനുശോചിച്ച് ഇറാൻ എംബസി. പരമകാരുണികനും കരുണാനിധിയുമായ ദൈവത്തിന്റെ നാമത്തിലാണ് അനുശോചനം. അമേരിക്കൻ ഭരണകൂടവും സയണിസ്റ്റ് ഇസ്രായേൽ ഭരണകൂടവും ചേർന്ന് നടത്തിയ ക്രൂരവും കുറ്റകരവുമായ ആക്രമണങ്ങളെത്തുടർന്ന്, ബഹുമാന്യനായ ആയത്തുള്ള സയ്യിദ് അലി ഖമേനി രക്തസാക്ഷിത്വം വരിച്ചതിൽ റിപ്പബ്ലിക് ഓഫ് ഇന്ത്യയിലെ ഇസ്ലാമിക് റിപ്പബ്ലിക് ഓഫ് ഇറാൻ എംബസി അഗാധമായ ദുഃഖവും അനുശോചനവും രേഖപ്പെടുത്തുന്നു. പരിശുദ്ധ ഇമാം മഹ്ദിയോടും മുസ്ലീം ഉമ്മത്തിനോടും, ഇസ്ലാമിക് റിപ്പബ്ലിക് ഓഫ് ഇറാനെന്ന മഹത്തായ രാഷ്ട്രത്തോടും, ലോകത്തിലെ എല്ലാ സ്വാതന്ത്ര്യദാഹികളായ രാഷ്ട്രങ്ങളോടും എംബസി ഹൃദയംഗമമായ അനുശോചനം അറിയിക്കുന്നുവെന്നും പ്രസ്താവനയിൽ പറഞ്ഞു.

മാപ്പർഹിക്കാത്ത കുറ്റകൃത്യത്തിന്റെ ഗുരുതരമായ പ്രത്യാഘാതങ്ങൾ ക്രിമിനൽ യുഎസ് ഭരണകൂടത്തിന്റെയും അധിനിവേശ സയണിസ്റ്റ് ഭരണകൂടത്തിന്റെയും മേൽ നേരിട്ട് പതിക്കുമെന്നതിൽ സംശയമില്ല. ഇതിന്റെ എല്ലാ പരിണതഫലങ്ങൾക്കും അവർ പൂർണ്ണ ഉത്തരവാദികളായിരിക്കും. അഭിമാനികളായ ഇറാൻ ജനത, കരുത്തോടും പ്രതിരോധത്തോടും നിശ്ചയദാർഢ്യത്തോടും കൂടി തങ്ങളുടെ ഉദാത്തമായ പാതയിൽ തുടരും. രാജ്യത്തിന്റെ നിലവിലുള്ള കാര്യങ്ങളിൽ യാതൊരു തടസ്സവും അനുവദിക്കില്ല. രക്തസാക്ഷികളുടെ ശുദ്ധമായ രക്തം തങ്ങളുടെ സ്വാതന്ത്ര്യവും അന്തസ്സും ഉന്നതമായ ആദർശങ്ങളും സംരക്ഷിക്കുന്നതിൽ ഇറാനിയൻ ജനതയുടെ ദൃഢനിശ്ചയത്തെ ശക്തിപ്പെടുത്തുകയേയുള്ളൂ.

ഈ നഗ്നമായ കുറ്റകൃത്യത്തെ ശക്തമായി അപലപിക്കാനും അരാജകത്വത്തിനും ആക്രമണത്തിനും മുന്നിൽ നിശബ്ദത പാലിക്കുന്നതിൽ നിന്ന് വിട്ടുനിൽക്കാനും ഇന്ത്യയിലെ ഇസ്ലാമിക് റിപ്പബ്ലിക് ഓഫ് ഇറാൻ എംബസി ലോകമെമ്പാടുമുള്ള സ്വതന്ത്രവും സ്വാതന്ത്ര്യം ആഗ്രഹിക്കുന്നതുമായ സർക്കാരുകളോട് ആഹ്വാനം ചെയ്യുന്നു.