കനിമൊഴിക്കും അമര്ത്യാ സെന്നിനും റൊമിലാ ഥാപ്പര്ക്കും ചെന്നിത്തലയുടെ കത്ത്, 'കേരളാ സർക്കാരിന്റെ സെമിനാറിൽ പങ്കെടുക്കരുത്'
തിരുവനന്തപുരം: ഈ മാസം 15-ന് സംസ്ഥാന സർക്കാർ സംഘടിപ്പിക്കുന്ന അന്താരാഷ്ട്ര സെമിനാറിൽ നിന്ന് പ്രമുഖ വ്യക്തിത്വങ്ങൾ വിട്ടുനിൽക്കണമെന്ന് ആവശ്യപ്പെട്ട് മുതിർന്ന കോൺഗ്രസ് നേതാവ് രമേശ് ചെന്നിത്തല. ഈ മാസം 15 ന് നടത്തുന്ന ഇന്റർ നാഷണൽ കോൺഫറൻസ് ഓൺ ഡെവലപ്മെന്റ് ആൻഡ് ഡെമോക്രസി എന്ന സെമിനാറിൽ പങ്കെടുക്കരുതെന്നാവശ്യപ്പെട്ട് സാമ്പത്തിക ശാസ്ത്രജ്ഞൻ അമർത്യാ സെൻ, ചരിത്രകാരി റൊമിലാ ഥാപ്പർ എന്നിവർക്ക് പുറമെ ഡി. എം. കെ എം.പി കനിമൊഴി, ജമ്മു കശ്മീർ മുൻ മുഖ്യമന്ത്രി ഫാറൂഖ് അബ്ദുള്ള തുടങ്ങിയവർക്കും അദ്ദേഹം കത്തയച്ചു.വികസനത്തെയും ജനാധിപത്യത്തെയും കുറിച്ച് തിരുവനന്തപുരത്ത് സംഘടിപ്പിക്കുന്ന സെമിനാർ സർക്കാരിന്റെ വെറുമൊരു പി.ആർ. വ്യായാമം മാത്രമാണെന്ന് ചെന്നിത്തല ആരോപിച്ചു.
ഫാസിസ്റ്റ് രീതിയിൽ പ്രവർത്തിക്കുന്ന സർക്കാർ തങ്ങളുടെ യഥാർത്ഥ മുഖം മറച്ചുവെക്കാൻ നടത്തുന്ന മുഖം മിനുക്കൽ പരിപാടിയാണ് ഇതെന്ന് കത്തിൽ പറയുന്നു. ജനാധിപത്യ മൂല്യങ്ങളെയും സ്ഥാപനങ്ങളെയും തകർക്കുന്ന സർക്കാർ ഇത്തരം സെമിനാറുകളിലൂടെ അന്താരാഷ്ട്ര തലത്തിൽ അംഗീകാരം നേടിയെടുക്കാനാണ് ശ്രമിക്കുന്നത്. ഈ പ്രചാരണ പരിപാടിയിൽ പങ്കാളികളായി സർക്കാരിന് ധാർമ്മികമായ സാധുത നൽകരുത്. വരാനിരിക്കുന്ന നിയമസഭാ തെരഞ്ഞെടുപ്പ് മുന്നിൽ കണ്ടുകൊണ്ടുള്ള ആസൂത്രിതമായ നീക്കമാണിതെന്നും ചെന്നിത്തല വിമർശിച്ചു.
കേരളത്തിലെ നിലവിലെ രാഷ്ട്രീയ സാഹചര്യം ജനാധിപത്യ വിരുദ്ധമാണെന്നും അഴിമതിയും സ്വജനപക്ഷപാതവും കൊണ്ട് സർക്കാർ പ്രതിസന്ധിയിലാണെന്നും ചെന്നിത്തല ചൂണ്ടിക്കാട്ടി. അടിച്ചമർത്തലുകളും പോലീസിനെ ഉപയോഗിച്ചുള്ള വേട്ടയാടലുകളും തുടരുന്ന പശ്ചാത്തലത്തിൽ, വികസനത്തെയും ജനാധിപത്യത്തെയും കുറിച്ച് സംസാരിക്കാൻ സർക്കാരിന് അർഹതയില്ല. അതിനാൽ, പ്രമുഖ വ്യക്തിത്വങ്ങൾ ഈ ചടങ്ങിൽ നിന്ന് വിട്ടുനിന്ന് തങ്ങളുടെ വിയോജിപ്പ് പ്രകടിപ്പിക്കണമെന്നും അദ്ദേഹം കത്തിലൂടെ അഭ്യർത്ഥിച്ചു.
Post a Comment