മികച്ച പാരഡി ഗാനത്തിന് കുഞ്ചൻ നമ്പ്യാര് പുരസ്കാരവുമായി സംസ്കാര സാഹിതി; 'ആവിഷ്കാര സ്വാതന്ത്ര്യത്തിനുമേലുള്ള കടന്നുകയറ്റങ്ങള്ക്കെതിരായ പ്രതിരോധം'
തിരുവനന്തപുരം: മലയാളത്തിലെ മികച്ച ആക്ഷേപഹാസ്യ പാരഡി ഗാനങ്ങൾക്ക് കുഞ്ചൻ നമ്പ്യാർ പുരസ്കാരം നൽകാൻ സംസ്കാര സാഹിതി തിരുവനന്തപുരം ജില്ലാ കമ്മിറ്റി. ആവിഷ്കാര സ്വാതന്ത്ര്യത്തിനെതിരായ കടന്നുകയറ്റങ്ങൾക്കെതിരെയുള്ള പ്രതിരോധമായിട്ടാണ് പാരഡി ഗാനങ്ങൾക്ക് അംഗീകാരം നൽകാൻ തീരുമാനിച്ചതെന്ന് സംസ്കാര സാഹിതി തിരുവനന്തപുരം ജില്ലാ കമ്മിറ്റി അറിയിച്ചു. സാമൂഹികമായി ഏറെ സ്വാധീനം ചെലുത്താനും സാമൂഹിക-രാഷ്ട്രീയ വിഷയങ്ങളിൽ പ്രതിരോധം ഉയർത്താനും കെൽപ്പുള്ള നിരവധി പാരഡി ഗാനങ്ങൾ മലയാളത്തിൽ ജനിച്ചിട്ടുണ്ടെന്നും സാമൂഹ്യ വിമർശനത്തിലൂടെയും ഹാസ്യ സാഹിത്യത്തിലൂടെയും രാജാവിനെ വരെ തിരുത്തിയ പാരമ്പര്യമാണ് കുഞ്ചൻ നമ്പ്യാരുടെതെന്നും സാംസ്കാര സാഹിതി പ്രസ്താവനയിൽ പറഞ്ഞു.
ആവിഷ്കാര സ്വാതന്ത്ര്യത്തെപ്പറ്റി വാചാലമാവുകയും എന്നാൽ, സർഗാത്മക സൃഷ്ടികളിൽ കത്തിവെയ്ക്കുകയും ചെയ്യുന്ന പുതിയ കാലത്ത് കുഞ്ചൻ നമ്പ്യാരുടെ ഓർമ്മകൾ ഉയർത്തി അവയെ പ്രതിരോധിക്കുന്ന രാഷ്ട്രീയമാണ് സംസ്കാര സാഹിതിയുടേതെന്നും ഭാരവാഹികള് പറഞ്ഞു. ലഭിക്കുന്ന എൻട്രികളിൽ നിന്നും മികച്ച പാരഡി ഗാനത്തിന് പുരസ്കാരം നൽകുമെന്ന് ജില്ലാ ചെയർമാൻ പൂഴനാട് ഗോപനും കൺവീനർ ഒ.എസ്. ഗിരീഷും അറിയിച്ചു. 25000 രൂപയും ശില്പവുമാണ് പുരസ്കാരം. ജനുവരി 10 ന് മുൻപ് ഗാനവും പിന്നണി പ്രവർത്തകരുടെ വിശദാംശങ്ങളും ഉൾപ്പെടെ മെയിലിലോ വാട്സാപ്പിലോ അപേക്ഷിക്കുക. ഇ മെയിൽ samskarasahithi.tvm@gmail.com വാട്സ്ആപ്പ് നമ്പർ 9400598000 9633509289, 9497022280, 94463 78904.
ശബരിമല സ്വര്ണക്കൊള്ള കേസുമായി ബന്ധപ്പെട്ട പരാഡി ഗാനത്തിനെതിരെ കേസെടുത്ത സംഭവത്തിന്റെ അടക്കം പശ്ചാത്തലത്തിലാണ് സംസ്കാര സാഹിതിയുടെ ആവിഷ്കാര സ്വാതന്ത്ര്യത്തിനുമേലുള്ള കടന്നുകയറ്റത്തിനെതിരായ പ്രതിരോധമെന്ന പേരിൽ പരാഡി ഗാനത്തിന് പുരസ്കാം നൽകുന്നതെന്നതാണ് ശ്രദ്ധേയം
Post a Comment