ഇരിട്ടിയിലെ പ്രിയ അസോസിയേറ്റിന്റെ ഉപസ്ഥാപനമായ തൃപുര അഗർത്തലയിലെ നോർത്ത് ഈസ്റ്റ് റബർ കമ്പനിയുടെ ഡോഡൗണിൽ നിന്നും ചെന്നൈയ് പെരുമ്പത്തൂരിലെ അപ്പോളോ ടയേഴ്സിലേക്ക് 30 ടൺ റബറുമായി പോയ ലോറി അപ്രത്യക്ഷമായി. ആഗസ്ത് 26ന് അഗർത്തലയിൽ നിന്നും പുറപ്പെട്ട ടിഎസ് 25 ടി 1326 തെലുങ്കാന രജിസ്ട്രേഷൻ ലോറിയാണ് 65 ലക്ഷത്തോളം രൂപ വിലവരുന്ന റബറുമായി കാണാതായത്. അഗർത്തല നോർത്ത് ഈസ്റ്റ് കമ്പിനി അധികൃതർ അഗർത്തല ബുജംനഗർ പോലീസിൽ പരാതി നൽകി. പോലീസ് നടത്തിയ അന്വേഷണത്തിൽ സെപ്തംബർ 30ന് തമിഴ്നാട് ആവഡിയിൽ ലോറിയുടെ ലൊക്കേഷൻ കണ്ടെത്തിയെങ്കിലും പിന്നീട് വിവരങ്ങൾ ഒന്നുമില്ല. തെലുങ്കാന സ്വദേശിയായ ലോറി ഡ്രൈവറുടെ മൂന്ന് ഫോൺ നമ്പറുകളും പ്രവർത്തന രഹിതമാണ്.
സാധാരണ അഗർത്തലയിൽ നിന്നും ചെന്നൈയ്ലേക്ക് ഏഴ് മുതൽ പതിനഞ്ച് ദിവസത്തിനുള്ളിൽ ലോഡ് എത്തേണ്ടതാണ്. ലോറി അഗർത്തലയിൽ നിന്നും പുറപ്പെട്ട ശേഷം യാത്രയ്ക്കിടയിൽ ലോറി ബ്രോക്ക്ഡൗണായി എന്ന വിവരം ട്രാൻസ്പോർട്ട് ഏജൻസിയിൽ നിന്നും കമ്പനി ഉടമകൾക്ക് വിവരം ലഭിച്ചിരുന്നു. പിന്നീട് ഒരു വിവരവും ലഭിക്കാഞ്ഞതിനെ തുടർന്നാണ് കമ്പിനി മാനേജർ അഗർത്തല പോലീസിൽ പരാതി നൽകിയത്. കർഷകരിൽ നിന്നും നേരിട്ട് സ്വീകരിക്കുന്ന റബർ ഗ്രേഡ് ഷീറ്റുകളാക്കി പ്രത്യേകം പ്രത്യേകം കെട്ടുകളാക്കിയാണ് ലോറിയിലേക്ക് കയറ്റിയിരിക്കുന്നത്.
അഗർത്തലയിൽ നിന്നും മേഘാലയ, ആസാം, പശ്ചിമബംഗാൾ, ഒഡീഷ, അന്ധ്ര സംസ്ഥാനങ്ങൾ വഴിയാണ് ചെന്നൈ എത്തുന്നത്. ആസാമിൽ നിന്നോ ചെന്നൈയിൽ നിന്നോ ഏജന്റുമാർ വഴി റബർ കൊള്ള ചെയ്യാനുള്ള സാധ്യതയാണ് അന്വേഷണ സംഘം പരിശോധിക്കുന്നത്. ഇങ്ങനെ കൊള്ളചെയ്യപ്പെടുന്ന റബർ കേരളത്തിലെ വിപണിയിലേക്കും എത്താനുള്ള സാധ്യതയുള്ളതിനാൽ റബർ കർഷകർ അല്ലാത്തവർ ഗ്രേഡ് റബറുമായി വരുന്നത് ശ്രദ്ധിക്കണമെന്ന് കാണിച്ച് കമ്പനി സാമൂഹ്യ മാധ്യമങ്ങളിൽ പോസ്റ്റ് ചെയ്തിട്ടുണ്ട്. നേരത്തെ അസാമിൽ നിന്നും ഇത്തരത്തിൽ കൊള്ള നടന്നിരുന്നു.
Post a Comment