തിരുവനന്തപുരം : കാവിക്കൊടിയുള്ള ഭാരതാംബ വിവാദത്തിൽ പാപ്പനംകോടുള്ള മന്ത്രി വി.ശിവൻകുട്ടിയുടെ ഓഫീസിലേക്ക് ബിജെപി നടത്തിയ മാർച്ചിൽ നേരിയ സംഘർഷം. മന്ത്രിയുടെ ഓഫീസിന് മുന്നിൽ ബിജെപി പ്രവർത്തകർ കാവിക്കൊടിയുള്ള ഭാരതാംബയുടെ ചിത്രമുയർത്തി. പിന്നാലെ പ്രകടനവുമായെത്തിയ സിപിഎം പ്രവർത്തകർ, ഓഫീസിന് മുന്നിൽ മന്ത്രി ശിവൻകുട്ടിയുടെ ഫ്ലക്സ് ഉയർത്തി. ഇതോടെ ബിജെപി പ്രവർത്തകർ കൂക്കിവിളിച്ചു. സിപിഎം പ്രവർത്തകർ തിരികെയും കൂക്കിവിളിച്ചു. പിന്നാലെ പൊലീസും പ്രവർത്തകരും തമ്മിൽ ഉന്തും തള്ളുമുണ്ടായി. മന്ത്രി വി ശിവൻകുട്ടിക്ക് അഭിവാദ്യമർപ്പിച്ച് പാപ്പനംകോട് ടൗണിൽ സിപിഎം പ്രകടനം നടത്തി.
അതേ സമയം, ഭാരതാംബ വിവാദത്തിൽ ഗവർണറും വിട്ടുവീഴ്ചക്കില്ല. യോഗദിന പരിപാടിയിലും കാവിക്കോടിയേന്തിയ ഭാരതാംബ ചിത്രത്തിൽ പുഷ്പാർച്ച നടത്തിയാണ് രാജ്ഭവൻ പരിപാടി തുടങ്ങിയത്. സിംഹപ്പുറത്തിരിക്കുന്ന, കാവിക്കൊടിയേന്തിയ ഭാരതാംബചിത്രത്തിൽ പുഷ്പാർച്ച നടത്തിയാണ് ഗവർണർ ഇന്നും പരിപാടി തുടങ്ങിയത്. തിരുവനന്തപുരത്തും പാലക്കാടും ഭാരതാംബ ചിത്രത്തിൽ ബിജെപിയും പുഷ്പാർച്ച നടത്തി.
Post a Comment